भोलीदेखी किया र टोयोटाका गाडी महंगो हुने, नेपाली बजारमा समेत प्रभाब पर्ने

भारतका दुई ठूला अटो उत्पादक किया र टोयोटाले अप्रिल १ देखी गाडीको मूल्य बृद्धि गर्न लागेका छन् । कियाले आफ्नो सबैजसो मोडलमा ३ प्रतिशतसम्म मूल्य बृद्धि हुने जनाएको छ भने टोयोटाले पनि १ प्रतिशत बृद्धि हुने बताएको छ ।

कियाले हाल भारतमा सोनेट, सेल्टोस र क्यारेन्स मोडलका कार उत्पादन गरि बिक्री गर्दै आएको छ । नेपाली बजारमा समेत यी सबै मोडल उपलब्ध रहेका कारण भारतीय बजारमा बढेको मूल्यले नेपालमा समेत प्रभाव पार्नेछ ।

यसैगरी टोयोटाले भारतमा ह्याचब्याक देखी सेडानसम्म र एमपीभीदेखी एसयूभीसम्मका गाडीहरु उत्पादन गर्दै आएको छ । नेपालमा भारतबाट फर्चूनर र इन्नोभा क्राइस्टा आयत हुँदै आएका कारण यी गाडीको मूल्य बृद्धि हुने देखिन्छ ।

गाडी उत्पादन गर्दा प्रयोग हुने सामाग्रीको मूल्य बढेका कारण मूल्य समायोजन गर्नु परेको दुबै कम्पनीको भनाई छ । टोयोटा र कियाको सिको गर्दै अन्य ब्राण्डले पनि छिट्टै मूल्य बृद्धि गर्ने तयारी थालेका छन् ।