कियाले एक वर्षमा बेच्यो ३० लाख बढी कार, स्पोर्टेज पहिलो स्थानमा

कोरियन अटो निर्माता कियाले नयाँ विश्वव्यापी बिक्री रेकर्ड हाँसिल गरेको घोषणा गरेको छ । सन् २०२४ मा ३० लाख ८९ हजार ४५७ युनिट कार बिक्री भएको कम्पनीले जनाएको हो ।

कार निर्माताले दक्षिण कोरियाको घरेलु बजारमा ५ लाख ४० हजार १० युनिट र बाहिर २५ लाख ४३ हजार ३६१ युनिट कार बिक्री गरेको हो । जुन अघिल्लो वर्षको तुलनामा ०.१ प्रतिशत बढी हो ।

कियाको यस रेकर्ड ब्रेक सेल्समा स्पोर्टेजले ठूलो हिस्सा ओगटेको छ । गत वर्ष स्पोर्टेज ५ लाख ८७ हजार ७१७ युनिट बिक्री हुँदा दोस्रो स्थानमा रहको सेल्टोसले ३ लाख १२ हजार २४६ युनिट सेल्स पाएको थियो ।

यसैगरी, तेस्रो स्थानमा रहेको सोरेन्टो २ लाख ८० हजार ७०५ युनिट बिक्री भएको जनाइएको छ । बिक्रीमा भएको वृद्धिको श्रेय ईभी३, के४ सेडान र हाईब्रिड कार्निभल जस्ता केही प्रमुख मोडलहरूको लन्चलाई दिइएको छ ।

यस वर्ष आफ्नो बिक्रीमा थप सुधार गर्दै विश्वव्यापी रूपमा ३२ लाख १६ हजार २०० युनिट कार बिक्री गर्ने कियाले लक्ष्य लिएको छ । कोरियामा ५ लाख ५० हजार, बाहिर २६ लाख ५८ हजार युनिट सहित ८ हजार २०० युनिट स्पेशल प्रपोज भेइकल बिक्री गर्ने उसको लक्ष्य छ ।