नयाँ इलेक्ट्रिक पिकअप भित्र्याउँदै मेगा मोटर्स, नेपाली बजारमा थपिदै नयाँ प्रतिस्पर्धी

काठमाडौं – मेगा मोटर्सले नेपाली बजारमा नयाँ इलेक्ट्रिक पिकअप भित्र्याउने भएको छ । चाइनिज कम्पनी शानडोङ कामा अटोमोबाइल्स म्यानुफ्याक्चरिङ कम्पनीद्वारा उत्पादित ‘कामा’ ब्रान्डको सो पिकअप उपलब्ध हुने जानकारी मेगा मोटर्सले सामाजिक सञ्जालमार्फत सार्वजनिक गरेको छ ।

मेगा मोटर्सले सो पिकअपको वारेमा धेरै जानकारी अहिले सार्वजनिक गरेको छैन । एलसीभी ईभी सेगमेन्टमा उपलब्ध सो पिकअप सहरी क्षेत्रमा सामान ओसारपसार गर्ने कार्यमा प्रयोग गर्न सकिन्छ । यसमा ७० किलोवाटको मोटर र १९० एमएम ग्राउन्ड क्ल्यिरेन्स रहेको छ । यसले करिव २७० किलोमिटरको रेन्ज दिने बताइएको छ ।

कामा एलसीभीको मूल्य सार्वजनिक गरिएको छैन । तर पनि नेपाली बजारको आधारमा यसको मूल्य २५ लाख देखि ३० लाख रुपैयाँको बिचमा पर्ने अनुमान गर्न सकिन्छ ।

नेपाली बजारमा पहिले देखि नै उपलब्ध टाटा एस ईभी, फोटोन पिकअप लगायतका मोडलसँग यसको प्रतिस्पर्धा हुनेछ ।

मेगा मोटर्सले सीएचटीसी इलेक्ट्रिक भ्यान समेत नेपालमा ल्याउने घोषणा केही दिन अघि गरेको थियो । यसको पनि सबै तयारी भइरहेको बताइएको छ ।

मेगा मोटर्स मेगा बिजनेस ग्रुप अन्तर्गतको कम्पनी हो । मेगा ग्रुपले पहिले देखि नै विभिन्न ब्रान्डका सवारी साधनको कारोबार गर्दै आएको छ । यसको सञ्चालक महेश पाल हुन् ।