कामा ब्रान्डको ईभी पिकअपको मूल्य २५ लाख ९० हजार, खुल्यो बुकिङ

काठमाडौं – नेपाली बजारमा भित्रिने कामा ईभी पिकअपको मूल्य २५ लाख ९० हजार रुपैयाँ हुने भएको छ । मेगा मोटर्सले नेपाली बजारमा उपलब्ध गराउने घोषणा गरेको नयाँ इलेक्ट्रिक पिकअपको मूल्य सामाजिक सञ्जालमार्फत सार्वजनिक गरेको हो । यसको सही मूल्य अनुमान गर्ने विजेतालाई कम्पनीले पुरस्कृत गर्ने बताएको छ ।

चाइनिज कम्पनी शानडोङ कामा अटोमोबाइल्स म्यानुफ्याक्चरिङ कम्पनीद्वारा उत्पादित ‘कामा’ ब्रान्डको सो पिकअप उपलब्ध हुने जानकारी मेगा मोटर्सले सामाजिक सञ्जालमार्फत सार्वजनिक गरेको छ ।

एलसीभी ईभी सेगमेन्टमा उपलब्ध सो पिकअप सहरी क्षेत्रमा सामान ओसारपसार गर्ने कार्यमा प्रयोग गर्न सकिन्छ । यसमा ७० किलोवाटको मोटर र १९० एमएम ग्राउन्ड क्ल्यिरेन्स रहेको छ । यसले करिव २७० किलोमिटरको रेन्ज दिने बताइएको छ ।

ब्याट्रीमा ५ वर्ष वा १ लाख किलोमिटर सम्मको वारेन्टी उपलब्ध हुनेछ । यसको बुकिङ समेत खुला गरिएको छ ।

नेपाली बजारमा पहिले देखि नै उपलब्ध टाटा एस ईभी, फोटोन पिकअप लगायतका मोडलसँग यसको प्रतिस्पर्धा हुनेछ ।

मेगा मोटर्सले सीएचटीसी इलेक्ट्रिक भ्यान समेत नेपालमा ल्याउने घोषणा केही दिन अघि गरेको थियो । यसको पनि सबै तयारी भइरहेको बताइएको छ ।

मेगा मोटर्स मेगा बिजनेस ग्रुप अन्तर्गतको कम्पनी हो । मेगा ग्रुपले पहिले देखि नै विभिन्न ब्रान्डका सवारी साधनको कारोबार गर्दै आएको छ ।