जावा ३५० अब नयाँ ब्लु कलरमा, यस्ता छन् महत्वपूर्ण अपडेट

जावा ३५० बाइक हालै केही महत्वपूर्ण अपडेटका साथ सार्वजनिक गरिएको थियो । अब भने सो बाइक नयाँ ब्लु कलरका साथ उपलब्ध हुने भएको छ ।

जावा येज्दी मोटरसाइकल्सले मुम्बईमा आयोजित महिन्द्रा ब्लुज फेस्टिभलमा जावा ३५० ब्लु प्रदर्शन गरेको छ । यसका आधारमा नयाँ आकर्षक कलर स्किम शोरुममा समेत उपलब्ध हुने अनुमान गरिएको छ ।

न्यु ब्लु शेड जावा ३५० मा यसको नामका साथै अन्य केही परिवर्तन गरिएको छ । हाल जावा ३५० मरुन, ब्ल्याक र मिस्टक ओरेन्ज गरी तीन कलर अप्सनमा उपलब्ध छ । नयाँ निलो कलरले ग्राहकलाई आकर्षित गर्ने अनुमान गरिएको छ ।

निलो कलर फ्युल ट्यांकनिर ट्रिपल–टोन फिनिसका साथ उपलब्ध छ भने किनारातिर क्रोम डिटेलिङ र सेन्टरमा एक ब्लु फिनिस छ । फ्युल ट्यांक र साइड प्यानलमा गोल्डन पिनस्ट्रिप रेट्रो स्टाइल छ ।

नयाँ जावा ३५० मा लामो ह्विलबेस, १७८ एमएमको ग्राउन्ड क्लियरेन्स छ । यसमा गरिएको सबैभन्दा महत्वपूर्ण परिवर्तन २९३ सीसीको सट्टा ३३४ सीसीको लिक्विड–कुल्ड, सिंगल सिलिन्डर इन्जिन हो । सो इन्जिन पुरानो इन्जिनको तुलनामा २१.८ बीएचपी कम छ, यद्यपि पिक टर्क २८.२ एनएम सम्म बढेको छ । अब सो बाइक स्लिप एन्ड असिस्ट क्लच, ड्युअल डिस्क ब्रेक र ड्युअल च्यानल एबीएसका साथ उपलब्ध हुनेछ ।

भारतमा जावा ३५० को मूल्य २ लाख १४ हजार भारु छ । नयाँ ब्लु कलरको मूल्य केही बढी हुन्छ कि भन्ने अनुमान छ । सो बाइकको प्रतिस्पर्धा रोयल इन्फिल्ड क्लासिक ३५०, होन्डा सीबी ३५०, हार्ले डेभिडसन एक्स४४० र बेनेली इम्पेरियल जस्ता बाइकसँग हुनेछ ।

नेपाली बजारमा अग्नि मोटोइंकले जावाका बाइक बिक्री–वितरण गरिरहेको छ । नेपाली बजारमा जावा ३५० हाल बिक्रीका लागि उपलब्ध छैन । जावा ४२ उपलब्ध छ भने येज्दीका तीन मोडल उपलब्ध छन् ।