इसुजु डी–म्याक्स पिकअप पनि अब इलेक्ट्रिकमा, कन्सेप्ट सार्वजनिक

आगामी साता देखि थाइल्यान्डमा शुरु हुने बैंकक इन्टरनेसनल अटो शोमा सार्वजनिक गर्ने तयारी भएको इसुजु डी–म्याक्स पिकअपको इलेक्ट्रिक कन्सेप्ट भर्सन थाइल्यान्डमा सार्वजनिक गरिएको छ ।

एमएचईभी अर्थात माइल्ड हाइब्रिड भर्सनमा उपलब्ध हुने सो ईभी पिकअप बजारमा आएमा यसले हाल प्रचलित अन्य ईभी पिकअपसँग प्रतिस्पर्धा गर्ने विश्वास गरिएको छ । यो भन्दा पहिले टोयोटाले पनि हाइलक्स पिकअपलाई ईभीमा उतार्ने योजना सार्वजनिक गरिसकेको छ ।

सो पिकअपमा ड्युअल मोटर सिस्टम छ, जसले १७६ पीएस पावर र ३२५ एनएम टर्क जेनेरेट गर्छ । यसमा भएको ई–एक्सलले फोर ह्विल ड्राइभ क्षमता प्रदान गर्छ । यसमा ६६.९ किलोवाट आवरको लिथियम आयोन ब्याट्री उपलब्ध छ । यद्यपि यसको रेन्ज र चार्जिङ क्षमताका वारेमा भने अहिले कुनै जानकारी सार्वजनिक गरिएको छैन । पिकअपको टप स्पिड १३० किलोमिटर प्रतिघण्टा भन्दा बढी र पेलोड क्षमता एक हजार किलोग्राम छ ।

इसुजुको सो ईभी पिकअप बजारमा भने सन् २०२५ मा मात्र उपलब्ध हुनेछ ।

नेपाली बजारमा समेत हाल पेट्रोलियम पदार्थबाट चल्ने इसुजु डी–म्याक्स पिकअप उपलब्ध छ । यसकारण भविष्यमा इसुजुको ईभी पिकअप नेपालमा समेत आउने अनुमान गर्न सकिन्छ ।