भारतमा कियामाथि १५ करोड ५० लाख डलर कर छलेको आरोप

भारत सरकारले किया मोटर्समाथि १५० मिलियन डलरको आयात कर छल्न कम्पोनेन्ट आयातलाई गलत वर्गीकरण गरेको आरोप लगाएको छ ।

मिडिया रिपोर्टका अनुसार कार निर्माताले कार्निवल एमपिभीको एसेम्बलीका लागि आयात गरिएका केही कम्पोनेन्टहरू गलत घोषणा गरेर कर छली गरेको आरोप लगाएको हो । भारतीय कर अधिकारीहरूले गत वर्ष अप्रिलमा किया मोटर्स इन्डियालाई १३.५ अर्ब रुपैयाँको गोप्य कर सूचना पठाएका थिए ।

कियामाथि कार्निभलका लागि ९० प्रतिशतभन्दा बढी पार्टपुर्जा आयात गरेको आरोप लगाइएको छ । सिकेडी आयातमा उच्च कर लाग्ने हुँदा त्यसलाई छल्न कम्पनीले गडबड गरेको हो ।

यस विषयमा प्रतिक्रिया दिँदै किया इन्डियाले प्रमाण र कागजातसहितको विस्तृत जवाफ पेश भइसकेको र अधिकारीहरूले यस विषयमा अझै समीक्षा गरिरहेको बताए । यदि दोषी पाइयो भने, कियाले ठूलो जरिवानाको सामना गर्न सक्छ र ३१० मिलियन डलर सम्म जरिवाना तिर्नुपर्ने हुन्छ ।

यसअघि, स्कोडा अटो तथा फक्सवागन इन्डियालाई पनि सोही कारणले १.४ बिलियन डलरको कर छलीको सूचना दिइएको थियो । कम्पनीले करको माग खारेज गर्न भारतीय अधिकारीहरूलाई मुद्दा हालेको छ ।