हुन्डाई भेन्यू अव ‘नाइट एडिसन’मा पनि, यस्ता छन् विशेषता

हुन्डाईले आफ्नो लोकप्रिय एसयूभी भेन्यूलाई नयाँ एडिसनमा उतारेको छ । रेगुलर भेन्यूमा व्ल्याक कलर थिम दिएर कम्पनीले यसको ‘नाइट एडिसन’ ल्याएको हो । सो नयाँ एडिसनको मूल्य १० लाखदेखी १३.४८ लाख भारुसम्म निर्धारण गरिएको कम्पनीले जनाएको छ । हुन्डाइले यसअघि क्रेटालाई पनि नाइट एडिसनमा ल्याएको थियो ।

भेन्यू नाइट एडिसनमा हुन्डाईले ग्रिल र लोगो सहित सम्पूर्ण एक्सटेरियरलाई आकर्षक कालो रङमा तयार पारेको छ । साथै यसको रुफ रेल, शार्क–फिन एन्टेना, ओरभिएमएस र अलोई ह्विल लगायत सम्पूर्ण भागमा कालो रङ पेन्ट गरिएको छ । यसको ब्रेक क्यालिपरमा भने रातो रङ दिइएको देख्न सकिन्छ । एक्सटेरियरमा जस्तै कार भित्रको इन्टेरियरलाई पनि ब्ल्याक कलर थिममै सजाइएको छ । यसको फिचर र मेकानिकल पक्षमा भने कुनै परिवर्तन गरिएको छैन ।

भेन्यूको नाइट एडिसनलाई हुन्डाइले १.२ लिटर पेट्रोल र १ .० लिटर टर्वो पेट्रोल इन्जिनमा उपलब्ध गराएको हो । यसको १.५ लिटर डिजेल इन्जिनलाई भने सो नयाँ एडिसनमा उपलब्ध गराइएको छैन । भेन्यू एन–लाइनमा जस्तै यसको नाइट एडिसनमा कम्पनीले ड्यास क्याम भने थप गरेको छ ।