हुन्डाईको ग्लोवल -यांकिङमा अझै सुधार, २४.६ अर्ब डलरको रेकर्ड ब्रान्ड मूल्यांकन

हुन्डाई मोटर कम्पनीले २४.६ अर्ब डलरको रेकर्ड ब्रान्ड मूल्यांकन हासिल गरेको छ । उक्त मूल्यांकन पछि कम्पनी २०२५ को इन्टरब्रान्ड बेस्ट ग्लोबल ब्रान्ड -यांकिङमा ३० औं स्थानमा दर्ज भएको छ । इन्टरब्रान्ड ग्लोबल ब्रान्ड कन्सल्टिङ फर्म हो । यसले हरेक वर्ष बहुराष्ट्रिय कम्पनीहरूको मूल्यांकन गर्दै आएको छ ।

हुन्डाईका अनुसार, सन् २०१० देखि ब्रान्ड मूल्यमा लगातार बृद्धि हुँदा विगत पाँच वर्षमा यसको मूल्य ७२ प्रतिशतले वृद्धि भएको छ । कम्पनी लगातार दोस्रो वर्ष शीर्ष ३० विश्वव्यापी ब्रान्डहरूमा सूचीबद्ध भएको हो ।

हुन्डाई मोटरको वरीयतामा भएको वृद्धिले यसको बलियो वित्तीय प्रदर्शन, रणनीतिक विश्वव्यापी विस्तार र नवप्रवर्तनमा निरन्तर लगानीलाई प्रतिबिम्बित गरेको जनाइएको छ । २०२४ मा कम्पनीले रेकर्ड राजस्व आर्जन गर्दै भारतमा ऐतिहासिक आईपीओ जारी गरेको थियो ।

हुन्डाईले आफ्नो ब्रान्ड उपस्थितिलाई बलियो बनाउँदै विद्युतीय गतिशीलता र सुरक्षामा पनि आफ्नो नेतृत्वलाई अगाडि बढाउँदै लगेको छ । यी प्रयासहरूले उच्च ब्रान्ड प्रभाव र वृद्धि सम्भावनामा योगदान पुर्याएको कम्पनीको भनाइ छ ।

हुन्डाईले पछिल्लो समय ईभी लाइनअपको विस्तारित दायरादेखि हाइब्रिड प्रविधिसम्म विविध ग्राहक आवश्यकताहरू पूरा गर्नेगरी नयाँ मोडलको विकास गरिरहेको छ । साथै कम्पनीले आफ्नो उपभोक्ता टच पोइन्टहरूलाई बलियो बनाउँदै अमेरिका र युरोपमा मात्र नभई उदीयमान बजारहरूमा समेत ध्यान केन्द्रित गर्दै लगेको छ ।