होन्डाको मिनी इलेक्ट्रिक कार ‘एन–वन ईः’ सार्बजनिक, यस्तो छ विशेषता

होन्डाले आफ्नो सबैभन्दा सानो इलेक्ट्रिक कार, एन–वन ई सार्बजनिक गरेको छ । बेलायतमा हालै सम्पन्न गुडवुड फेस्टिवल अफ स्पिडमा प्रोटोटाइप देखाइएको सो नयाँ ईभीको जापमानमा आधिकारिक डेब्यू गरिएको हो ।

जापानमा यसै वर्षको सेप्टेम्वरदेखी बिक्रीका लागि उपलब्ध हुने एन–वन ईः एक इलेक्ट्रिक केई कार हो । यसमा अग्लो छाना र साना ह्विलसहितको बक्सी स्टाइल छ । यो कार निकै फंकी र क्यूट देखिन्छ । होन्डाले अहिलेसम्म कुनै प्राविधिक विवरणहरू खुलासा नगरेपनि एन–वन ईः ३,४०० मिमी भन्दा कम लामो हुने र ६३ बीएचपी उत्पादन गर्ने एकल इलेक्ट्रिक मोटर हुने अपेक्षा गरिएको छ ।

इलेक्ट्रिक पावरट्रेन यस वर्षको सुरुमा होन्डाले खुलासा गरेको एन–भ्यान ईः जस्तै हुने अपेक्षा गरिएको छ । होन्डाका अनुसार एन–भ्यानले एकल चार्जमा २४५ किलोमिटर रेन्ज दिनसक्छ, त्यसैले एन–वन ईः ले यसको साइजका कारण पनि सोभन्दा बढी नै रेन्ज पाउने अपेक्षा गरिएको छ । एन–भ्यानले ५० किलोवाट क्षमताको डीसी चार्जिङ सपोर्ट गर्दछ ।

सो मिनी कारको भित्री भाग सरल र सफा देखिन्छ । रोटरी भोल्युम डायलको साथमा धेरै फिजिकल बटनहरु राखिएको कारमा ट्रान्समिसन सेलेक्टरमा एक–पेडल ड्राइभिङ मोड संलग्न गर्न छेउमा अलग्गै बटन दिइएको छ । स्मार्टफोन राख्नको लागि टचस्क्रिन मुनि एउटा शेल्फ उपलब्ध हुनेछ भने पछाडिका सिटलाई ५०ः५० अनुपातमा फ्ल्याट फोल्ड गर्न सकिन्छ ।

एन–वन ईःको सबैभन्दा ठूलो हाइलाइट विशेषता भनेको भेइकल–टु–लोड फंक्सन हो । यद्यपि यो फंक्सन प्रयोग गर्न ग्राहकले होन्डाको सहायक क्याटलगबाट एडाप्टर किन्नुपर्नेछ, जसमा ब्याट्री कति भरिएको छ भनेर थाहा दिन ड्यास–टप एलईडी सूचक र ट्विन शेल्बी स्टायलका स्ट्राइप भएको स्पोर्टी कस्मेटिक किट पनि समावेश छ ।