इलेक्ट्रिक टु–ह्विलरका लागि भारतमा होन्डाको छुट्टै प्लान्ट, २०३० सम्ममा ३० मोडल ल्याउने

होन्डाले भारतमा इलेक्ट्रिक टु–ह्विलरका लागि छुट्टै डेडिकेटेड प्लान्ट स्थापना गर्ने योजना बनाएको छ । नयाँ प्लान्ट सन् २०२८ सम्ममा सञ्चालनमा आउने जनाइएको छ ।

होन्डाका अनुसार नयाँ फ्याक्ट्रीमा विभिन्न मोडल उत्पादन गरिनेछ । यसले स्वदेशी बजारमा मात्रै नभई यहाँका उत्पादनहरु विदेशी बजारमा पनि निकासी हुनेछन् ।

मोटरसाइकल एण्ड पावर प्रोडक्ट्स इलेक्ट्रिफिकेशन बिजनेस युनिटका प्रमुख दाइकी मिहाराले कम्पनीले १०० सीसी कम्युटर बाइकसँग तुलना गर्न सकिने विद्युतीय मोटरसाइकल विकास गर्ने योजना रहेको बताए । यो मोटरसाइकल अनुरूप स्पेसिफिकेसन विकास गर्न र स्थिर खरिद सुनिश्चित गर्न होन्डाले ब्याट्री निर्माताहरूसँग काम गरिरहेको छ ।

हाल, होन्डाले कर्नाटक इकाईमा आफ्नो इलेक्ट्रिक स्कुटरहरू, एक्टिभा ई र क्यूसी१ उत्पादन गर्दै आएको छ । सोही क्षेत्रमा नयाँ प्लानट स्थापना गरिने सम्भावना छ ।

सन् २०३० सम्ममा होन्डाले विश्व बजारमा ३० वटा ईभी लन्च गर्ने र वार्षिक ४० लाख युनिट बिक्री गर्ने योजना बनाएको छ । तीमध्ये १३ वटा मोडल यसअघि नै सार्वजनिक भइसकेका छन् । मोटरसाइकल निर्माता कम्पनीले सोही वर्षसम्म विश्वव्यापी २ पाङ्ग्रे बजारको ५० प्रतिशत हिस्सा नियन्त्रण गर्ने लक्ष्य राखेको छ ।