टाटा ईभीसंग प्रतिस्पर्धा गर्न हुन्डाईले तीन नयाँ मोडल ल्याउँदै

हुन्डाईले बहुप्रतिक्षित क्रेटा इलेक्ट्रिकको लन्चसंगै ईभी सेग्मेन्टमा थप तीन नयाँ मोडल उतार्ने योजना बनाएको छ । कार निर्माताले भारतमा निर्मित तीनवटा नयाँ इलेक्ट्रिक कारहरू लन्च गर्नका लागि नयाँ रणनिती बनाएको हो ।

हुन्डाई मोटर इन्डियाका सीओओ तरुण गर्गले अटो कार इण्डियासंग भने, ‘क्रेटा इलेक्ट्रिक पछि थप तीन मोडलहरू आउनेछन् र यसले भोल्युम पनि बढाउनेछ ।’ आगामी मोडल बर्न ईभी र कम्वसन दुबै प्लेटफर्ममा आधारित हुने उनले बताए । भविष्यका सबै ईभीहरू क्रेटा इलेक्ट्रिकसँगै स्थानीय रूपमा उत्पादन हुने गर्गको भनाई छ ।

नयाँ आउने ईभीको विवरण सार्बजनिक नभएपनि हुन्डाईले २०२६ मा टाटा पन्च ईभीसंग प्रतिस्पर्धा गर्न इलेक्ट्रिक सब–कम्प्याक्ट एसयुभी ल्याउने सम्भावना छ । यो ई–जीएमपी(के) प्लेटफर्ममा आधारित हुनेछ । जसले ३५५ किलोमिटर सम्मको दायरा प्रदान गर्नेछ ।

हुन्डाईले भेन्यु र ग्रान्ड आई १० निओसको प्योर–इलेक्ट्रिक संस्करणहरू पनि प्रस्तुत गर्नसक्ने बताइएको छ । यसैगरी टाटा नेक्सनसंग प्रतिस्पर्धा गर्न उसले भेन्यूको इलेक्ट्रिक भर्सनसमेत उतार्नसक्ने संभावना छ । यसैगरी ग्रान्ड आई१० मा आधारित इलेक्ट्रिक ह्याचब्याकले टाटा टियागोसंग प्रतिस्पर्धा गर्नेछ ।