फास्ट चार्जिङ सुविधा सहित इलेक्ट्रिक मोटरसाइकल लन्च गर्दै हाेन्डा

होन्डाले आफ्नो नयाँ इलेक्ट्रिक मोटरसाइकल लन्च गर्ने तयारी गरेको छ। कम्पनीले सेप्टेम्बर २ मा सो बाइक लन्च गर्ने योजना बनाएको हो। यसबारे कम्पनीले सामाजिक सञ्जालमार्फत टिजर भिडियो सार्वजनिक गरिसकेको छ ।

कम्पनीले ल्याउन लागेको नयाँ बाइक गत वर्ष देखाइएको ईभी फन कन्सेप्टमा आधारित देखिन्छ। कम्पनीले उक्त बाइकले लगभग ५०० सीसी क्षमताको पेट्रोल बाइकसरहको प्रदर्शन दिने दाबी गरेको छ । यसले करिब ५० बीएचपी पावर उत्पादन गर्ने अपेक्षा गरिएको छ। इलेक्ट्रिक सवारी भएकाले यसको टर्क पनि निकै प्रभावशाली हुने अनुमान गरिएको छ।

बाइकमा डिजिटल टीएफटी इन्स्ट्रयुमेन्ट क्लस्टर, डेटाइम रनिङ लाइट, क्लिप-अन स्टाइल ह्यान्डलबार, बार-एन्ड मिरर र सिंगल साइडेड स्विङ आर्म जस्ता फिचर हुनेछ । यसको राइडिङ पोजिसन सामान्य भए तापनि बाइकलाई स्पोर्टी लुक दिइएको छ।

साथै सो बाइकमा सीसीएस२ चार्जिङ सपोर्ट पनि हुनेछ, जसको अर्थ यसले कार सरह फास्ट चार्जिङ सुविधा पाउनेछ।