होण्डा मोटरसाइकल र स्कुटरको उत्पादन नेपालमै सुरु, भैरहवामा सुबिधासम्पन्न प्लान्ट

काठमाडौं– होण्डाका दुई पाङ्ग्रे सवारीको एसेम्बल अब नेपालमै हुने भएको छ । बुधबार होण्डा मोटरसाइकलको मुख्य बिजिनेस युनिटका भाइस–प्रेसिडेन्ट मिनोरु काटोद्वारा भैरहवामा प्लान्टको उद्घाटन भएसंगै नेपालमा उत्पादन सुरु भएको हो ।

कार्यक्रममा होण्डा कम्पनीका विभिन्न स्वदेशी तथा विदेशी प्रतिनिधिहरुले सहभागिता जनाएका थिए । २ लाख स्क्वायर फिट क्षेत्रफलमा फैलिएको प्लान्ट निर्माणमा १ अर्ब ५० करोड लगानी भएको स्याकार ट्रेडिङ कम्पनीले जनाएको छ । उक्त प्लान्टबाट बार्षिक १५ हजार मोटरसाइकल र स्कुटर उत्पादन गर्ने लक्ष्य लिइएको छ ।

स्याकार ट्रेडिङले विगत ५५ बर्ष भन्दा बढी समयदेखि होण्डा मोटरसाइकल र स्कुटरको बिक्री गर्दै आएको छ । प्लान्टबाट उत्पादन भने हिमाल मोटो प्रा.लि.मार्फत हुने जनाइएको छ ।

नेपालमै प्लान्ट स्थापना गरेर सावरी साधन उत्पादन गर्न राज्यले प्रोत्साहन गरेपछि यसअघि बजाज, टिभिएस, यामाहा र रोयल इन्फिल्डले एसेम्बल प्लान्ट लगाइसकेका छन् भने हिरो र सुजुकीले छिट्ट्रै उत्पादन सुरु गर्ने तयारी गरेका छन् ।