यसरी लिन सकिन्छ दैनिक १६७ रुपैयाँमा होन्डा साइन, यस्ता छन् अन्य विकल्प

नेपाली बजारमा पहिले देखि नै लोकप्रिय रहेको होन्डा साइन अहिले पनि उत्तिकै लोकप्रिय छ । हाल नेपाली बजारमा साइनका विभिन्न चार मोडल उपलब्ध छन् । यी मध्ये सबैभन्दा कम मूल्य पर्ने सीबी साइन डीआरएस हो । यसको मूल्य २ लाख ५३ हजार ९ सय रुपैयाँ छ ।

होन्डाको नेपालका लागि आधिकारिक वितरक स्याकार ट्रेडिङ कम्पनीले यो मोटरसाइकल किन्ने ग्राहकका लागि हाल तीन विकल्प प्रदान गरिरहेको छ । यस अनुसार शुरुमा ६० हजार रुपैयाँ डाउन पेमेन्ट गरेर बाँकी रकमलाई किस्ताबन्दीमा तिर्न सकिन्छ ।

त्यसैगरी १ प्रतिशत ब्याजदरमा ऋण पाउने गरी अर्को अफर उपलब्ध छ भने दैनिक १६७ रुपैयाँ ईएमआई तिर्ने गरी अर्को विकल्प उपलब्ध छ ।

दैनिक १६७ रुपैयाँ ईएमआई तिर्ने स्किममा मोटरसाइकल लिन चाहनेले शुरुमा मोटरसाइकलको मूल्यको ६० प्रतिशत अर्थात १ लाख ५२ हजार ३४० रुपैयाँ बुझाउनु पर्छ । अनि बाँकी रकम १ लाख १ हजार ५६० रुपैयाँ फाइनान्स गर्नुपर्छ ।

सो रकमलाई दुई वर्ष अर्थात २४ महिना सम्म किस्ताबन्दीको रुपमा तिर्न सकिन्छ । यो अवस्थामा १६.७५ प्रतिशत ब्याजदर हुन्छ । अनि मासिक ५ हजार १० रुपैयाँ बुझाउनु पर्छ । यसलाई दैनिक रुपमा हिसाब गर्दा १६७ रुपैयाँ हुन आउछ ।

होन्डाले हाल नयाँ वर्ष २०८० को अवसरमा ‘होन्डा चुज योर स्किम’ समेत ल्याएको छ । यो स्किममा समेत सहभागी भएर विभिन्न मोटरसाइकल वा स्कुटर लिन सकिन्छ ।