भारतमा बिक्री बन्द भएको होन्डा नाभी निर्यातमा उत्कृष्ट

होन्डाले भारतमै डिजाइन गरेर उत्पादन गरको अनौठो बाइक नाभी निर्यातमा उत्कृष्ट ठहरिएको छ । ८ वर्षअघि भारतमा लन्च भएको नाभी मोटरसाइकल र स्कुटरको मिक्स भर्सनका रुपमा आएको थियो । युनिक डिजाइका कारण यसले भारतमा राम्रो बजार लिने कम्पनीको अपेक्षा थियो ।

तर सोचेअनुसार बजार लिन नसकेपछि होन्डाले यसलाई भारतमा बिक्री गर्न बन्द गरिसकेको छ भने नेपाली बजारमा समेत आएर चर्चा बटुलेको सो बाइक यहाँको बजारमा पनि उपलब्ध हुन छाडिसकेको छ ।

बिक्री बन्द भएपनि नाभीले भारतबाट सबैभन्दा धेरै निर्यात हुने होन्डा बाइकको परिचय बनाएको छ । गत फेब्रुअरीमा कुल १३ हजार ३९३ यूनिट निर्यात भएर यसले होन्डाको बाँकी मोडललाई पछि पारेको हो । होन्डाको कुल निर्यातमा नाभी एक्लैको हिस्सा ३१.७० प्रतिशत छ । दोस्रो स्थानमा रहेको डिओ ९ हजार ४२३ यूनिट निर्यात हुँदा उसको हिस्सा २२.३० प्रतिशत छ । डिओलाई होन्डाले नेपालमा सबैभन्दा धेरै निर्यात गर्दै आएको छ ।

यसैगरी भारतीय बजारमा महिनाकै २ लाख युनिट बिक्री हुने एक्टिभा स्कुटरले निर्यातको सूचिमा तेस्रो स्थान हाँसिल गरेको छ । फेब्रुअरीमा एक्टिभा कुल ४ हजार ९९२ यूनिट निर्यात भएको हो । सबैभन्दा बढी निर्यात हुने मोटरसाइकलमा भने होन्डा साइन र कममा हाइनेस ३५० मोडल रहेका छन् । उक्त महिना ४ हजार १७० यूनिट सिबी साइन निर्यात हुँदा हाइनेस ३५० को कुनै यूनिट निर्यात भएन ।

अमेरिकी बजारमा समेत उपलब्ध होन्डा नाभीमा ११० सीसी क्षमताको ईन्जिन जडान गरिएको छ । उक्त इन्जिनले ८ पीएस पावर र ९ एनएम टर्क जेनेरेट गर्दछ । बाइकमा ३.८ लिटरको इन्धन ट्यांकी र १५६ एमएमको ग्राउन्ड क्लियरेन्स छ ।