होन्डा अमेजले पुरा गर्यो १० वर्ष, भारतमा सफल तर नेपालमा लिन सकेन बजार

होन्डाको लोकप्रिय सव कम्प्याक्ट सेडान अमेजले भारतमा उत्पादन थालेको १० वर्ष पुरा गरेको छ । सन् २०१३ अप्रिलबाट उत्पादन शुरु भएको यो कार हालसम्म ५ लाख ३० हजार युनिट बिक्री भएको कम्पनीले जनाएको छ । होन्डाले भारतमा बिक्री गर्ने कुल कारमा ५० प्रतिशत भन्दा वढि हिस्सा ओगट्दै आएको अमेज नेपाली बजारमा भने सफल हुन सकेन ।

अमेजको पहिलो जेनेरसन सन् २०१८ सम्म बिक्री हुँदै आएको थियो । त्यसपछि कम्पनीले सेकेन्ड जेनेरसन अमेज बिक्री गर्दै आइरहेको छ । पहिलो जेनेरेसन अमेजलाई होन्डाले २ लाख ६० हजार युनिट बिक्री गरेको थियो भने त्यसपछि आएको सेकेन्ड जेनेरेसनको बिक्री हालसम्म २ लाख ७० हजार युनिट पुगेको छ । यो लोकप्रिय कम्प्याक्ट सेडानलाई होन्डाले दक्षिण अफ्रिका र सार्कमा आवद्ध केही देशहरुमा बिक्री गर्दै आइरहेको छ ।

अमेज हाल १.२ लिटर आई–भीटीईसी ईन्जिनमा उपलब्ध छ । कारमा ५ स्पिड म्यानुअल र सीभीटी ट्रान्समिनसको विकल्प दिइएको छ । भारतमा हालसालै लागु भएको आरडीई नम्र्समा यो कारलाई पनि अपडेट गरिएको छ । औषतमा वार्षिक ५० हजार युनिट हाराहारी विक्री हुँदै आएपनि नेपालमा भने यसले बजार लिन सकिरहेको छैन ।

नेपाल आएको सुरुवाती समयमा राम्रै संख्यामा बिक्री भएपनि अमेजको बिक्री त्यसपछि भने निरन्तर ओरालो लाग्दै आएको हो । होन्डालाई स्याकार ट्रेडिङ कम्पनीले आयत गरी बिक्री गर्दै आइरहेको छ ।