हिरोलाई पछि पार्दै होन्डा बन्यो भारतको नम्वर–१ दुई पाङ्ग्रे ब्रान्ड

काठमाडौं– विगत लामो समयदेखी भारतको नम्वर–१ दुई पाङ्ग्रे ब्रान्ड रहँदै आएको हिरोले अन्तत आफ्नो ताज गुमाएको छ । हिरोको बिक्रीलाई पछि पार्दै होन्डाले नम्वर–१ दुई पाङ्ग्रेका रुपमा आँफूलाई स्थापित गराएको हो । पछिल्लो केही समययता होन्डाले हिरोसंगको दुरी कम गर्दै छिट्टै नम्वर १ ब्रान्ड बन्ने संकेत देखाएको थियो ।

गत जुलाईमा हाँसिल भएको बिक्रीका आधारमा हिरोलाई पछि पार्दै होन्डा नम्वर–१ दुई पाङ्ग्रे ब्रान्ड बनेको हो । जुलाई महिनामा हिरोले भन्दा १ लाख १३ हजार यूनिट धेरै मोटरसाइकल तथा स्कुटर होन्डाले बिक्री गरेको तथ्यांक छ । यो बिक्री संख्यामा स्थानिय बजार र निर्यातको तथ्यांक पनि समावेश गरिएको छ ।

उक्त महिना होन्डाले ४ लाख ८३ हजार यूनिट मोटरसाइकल तथा स्कुटर बिक्री गर्दा हिरोले जम्मा ३ लाख ७० हजार यूनिटमात्र बिक्री गरेको छ । होन्डाको कुल बिक्रीमा ९१ प्रतिशत हिस्सा स्थानिय बजारले लिएको छ भने ९ प्रतिशत निर्यात भएको हो ।

यसैगरी हिरोले बिक्री गरेको ३ लाख ७० हजार मोटरसाइकल र स्कुटरमध्ये ९४ प्रतिशत स्थानिय बजारले र ६ प्रतिशत निर्यातले ओगटेको छ । यी दुबै ब्रान्डको बिक्री गत जुन महिनाको तुलनामा घटेको छ । जसअनुसार होन्डाले स्थानिय बजारमा हाँसिल गरेको बिक्री ९ प्रतिशतले कम हुँदा निर्यात भने २१ प्रतिशतले बढाएको छ ।

उता हिरोको भने स्थानिय बजारमा निकै ठूलो गिरावट आउँदा निर्यात भने उच्च दरले बृद्धि भएको छ । गत जुन महिनाको तुलनामा हिरोले स्थानिय बजारमा २९ प्रतिशतले बजार गुमाउँदा निर्यातमा भने ८९ प्रतिशतले सुधार गरेको हो । होन्डाको बिक्रीमा ठूलो हिस्सा स्कुटरले ओगट्दा हिरोमा भने मोटरसाइकलको योगदान निकै उच्च छ ।