यस्तो छ नेपाली बजारमा भित्रिने अन्तिम तयारीमा रहेको हिरो एक्सपल्स २०० फोरभी

हिरोको सर्बाधिक लोकप्रिय एड्भेन्चर मोटरसाइकल एक्सपल्स २०० फोरभी नेपाल भित्रिने अन्तिम तयारीमा रहेको छ । आधिकारिक बितरक नेपाल जनरल मार्केटिङ स्रोतका अनुसार अंग्रेजी नयाँ बर्ष २०२२ को जनवरी अन्तिमसम्म यो बाइक नेपाल भित्रिसक्ने छ ।

नेपाली बजारमा हिरो एक्सपल्स २०० निकै नै रुचाइएको मोटरसाइकल हो । नयाँ एक्सपल्स २०० फोरभी थप पावरफुल इन्जिन सहित आउनेछ ।

नयाँ एक्सपल्स २०० ४भीले १८.८ पावर र १७.३५ एनएम टर्क जेनेरेट गर्छ, जुन हाल प्रचलित एक्सपल्स भन्दा बढी हो । हालको स्ट्यान्डर्ड एक्सपल्स २०० ले १७.८ बीएचपी पावर र १६.४५ एनएम टर्क जेनेरेट गर्छ ।

इन्ट्री लेवलको सो एड्भेन्चर मोटरसाइकललाई पावरफुल बनाउनका लागि अन्य धेरै अपडेट समेत गरिएको छ । यसमा अपडेटेड ७ फिन आयल कुलर र सुधारिएको ट्रान्समिसन प्रयोग गरिएको छ । त्यसैगरी एलईडी हेडल्याम्प समेत दिइएको छ ।

यो नयाँ मोटरसाइकलमा ब्लुटुथ सपोर्ट र टर्न बाई टर्न नेभिगेसन सहितको फुल डिजिटल इन्स्ट्रयुमेन्ट क्लस्टर, गियर इन्डिकेटर, सिंगल च्यानल एबीएस, लङ ट्राभल सस्पेन्सन, ड्युअल परपोज टायर आदि उपलब्ध छ ।

भारतीय बजारमा यो बाइकको मूल्य १ लाख २८ हजार भारु तोकिएको छ, जुन हाल प्रचलित स्ट्यान्डर्ड एक्सपल्स २०० भन्दा ५ हजार भारु बढी हो । हाल उपलब्ध एक्सपल्स २०० को मूल्य नेपालमा ४ लाख २ हजार रुपैयाँ छ । एक्सपल्स ४भीको मूल्य ४ लाख १० हजार भन्दा बढी नै पर्ने अनुमान गर्न सकिन्छ ।