परीक्षणका क्रममा देखियो हिरो एक्सपल्स ४२१, छिट्टै बजारमा आउने

हिरो मोटोकर्पको बहुप्रतिक्षित एड्भेन्चर मोटरसाइकल एक्सपल्स ४२१ लद्दाखको कठिन भूगोलमा उच्च अल्टिच्युड परीक्षणको क्रममा देखिएको छ । हालै सार्वजनिक भएका जासूसी तस्बिरहरूमा बाइकको अहिलेसम्मकै स्पष्ट रूप र डिजाइन विवरणहरू बाहिर आएको हो ।

सार्वजनिक तस्बिरअनुसार, यो मोटरसाइकललाई कडा र अफ–रोड ट्र्याकहरूका लागि विशेष रूपमा तयार पारिएको देखिन्छ । एक्सपल्स ४२१ को बडी बनावट अग्लो छ, जसमा मस्कुलर र आकर्षक अगाडिको फेयरिङ दिइएको छ ।

बाइकमा फ्ल्याट हेडल्याम्प सेटअप र विन्डब्लास्टबाट बच्नका लागि एउटा अग्लो विन्डस्क्रिन दिइएको छ । साथै, ह्यान्डल सुरक्षाका लागि ह्यान्डगार्ड र इन्जिनलाई जोगाउन तल पट्टि बलियो ब्याश प्लेट राखिएको छ ।

अपस्वेप्ट एक्जस्ट र लामो यात्रामा सामान बोक्नका लागि प्यानियर र ब्यागेज राख्ने माउन्ट्स उपलब्ध गराइएको छ ।

यो नयाँ बाइकमा आधुनिक प्रविधिलाई विशेष प्राथमिकता दिइएको छ । बाइकमा पूर्ण रूपमा डिजिटल इन्स्ट्रुमेन्ट कन्सोल उपलब्ध छ, जसमा ब्लुटुथ कनेक्टिभिटी र नेभिगेसन जस्ता सुविधाहरू हुने अपेक्षा गरिएको छ । लामो दूरीको यात्रालाई आरामदायी बनाउन यसमा क्रूज कन्ट्रोल प्रविधि समेत थपिएको छ, जसले यसलाई हाइवे राइडिङका लागि उत्कृष्ट बनाउँछ ।

एक्सपल्स ४२१ मा नयाँ ४२१ सीसी सिंगल–सिलिन्डर, लिक्विड–कूल्ड इन्जिन जडान हुने अनुमान गरिएको छ । यो शक्तिशाली इन्जिनलाई ६ स्पीड गियरबक्ससँग जोडिएको छ, जसले चालकलाई खराब बाटोमा बलियो टर्क र हाइवेमा आरामदायी क्रुजिङ स्पिड प्रदान गर्नेछ ।

सो नयाँ बाइकको अगाडी टेलिस्कोपिक फोर्क र पछाडी मोनोशक सस्पेन्सन उपलब्ध गराइएको छ । सुरक्षाका लागि दुवै पाङ्ग्रामा डिस्क ब्रेक र डुअल च्यानल एबिएस जडान गरिएको छ ।

लद्दाखको कठोर वातावरणमा अन्तिम परीक्षण भइरहेकाले, हिरो मोटोकर्पले यो बाइकलाई छिट्टै नै आधिकारिक रूपमा बजारमा सार्वजनिक गर्ने अनुमान गरिएको छ।