हिरोका नयाँ प्रिमियम मोटरसाइकल १५० देखि ३५० सीसी सेग्मेन्टमा आउने

विश्वकै ठूलो दुई–पांग्रे सवारी साधन निर्माता कम्पनी हिरो मोटोकर्पले प्रिमियम मोटरसाइकल बजारमा आफ्नो पकड बलियो बनाउन तीव्र तयारी सुरु गरेको छ । कम्पनीले आगामी आर्थिक वर्ष २०२६–२७ भित्र १५० सीसीदेखि ३५० सीसी सेगमेन्टमा नयाँ प्रिमियम मोटरसाइकलहरू बजारमा ल्याउने घोषणा गरेको हो ।

आफ्नो आर्थिक वर्ष २०२६ को भर्खरै सार्वजनिक वार्षिक प्रतिवेदनमा कम्पनीले यस योजनाबारे विस्तृत जानकारी दिएको छ । प्रतिवेदन अनुसार, १५०–३५० सीसीको प्रिमियम स्वीट स्पटमा आफ्नो उपस्थिति विस्तार गर्न कम्पनीले हिरो मोटोकर्प र हार्ले–डेभिडसन दुवै ब्रान्डअन्तर्गत नयाँ उत्पादनहरू ल्याउन लागेको हो ।

हिरो मोटोकर्पका अनुसार, प्रिमियम मोटरसाइकलको बजारले समग्र दुईपांग्रे बजारको तुलनामा निकै तीव्र गतिमा वृद्धि गरिरहेको छ । जीएसटीको दरमा गरिएको समायोजनका कारण यो सेगमेन्टले आर्थिक वर्ष २०२६–२७ मा १८ प्रतिशतको वार्षिक वृद्धि हासिल गरिसकेको छ ।

कम्पनीले उल्लेख गरेअनुसार, ३५० सीसीभन्दा माथिको प्रिमियम सेगमेन्टमा उच्च कर लाग्ने भएकाले त्यसको वृद्धिदर केही सुस्त छ । सोही कारण, ग्राहक र निर्माता दुवैको रोजाइ अहिले १५०–३५० सीसीको श्रेणीमा पर्न थालेको छ, जहाँ किफायती मूल्यमा उत्कृष्ट प्रविधि र प्रिमियम अनुभव प्राप्त हुन्छ ।