रेन्ज बढेर आउँदै हेनरी भोल्ट, अव डिसी फास्ट चार्जर समेत सपोर्ट गर्ने

काठमाडौं–नेपाली ईभी बजारमा लोकप्रिय बनिरहेको मिनी कार हेनरी भोल्टको नयाँ मोडल लन्च हुने भएको छ । हेनरी भोल्टको नेपालका लागि आधिकारिक वितरक एस क्यूव इन्टरप्राइजेजले नयाँ मोडल सी प्रोलाई नाइमा मोबिलिटी एक्सपोमार्फत लन्च गर्न लागेको हो । सो नयाँ मोडलको मूल्य २३ लाख भन्दा कम निर्धारण हुने जनाइएको छ ।

नयाँ मोडल सी प्रोमा २५ किलोवाट आवरको ब्याट्री प्याक जडान गरिएको छ । जसले एकपटको फुल चार्जमा ३००(सिएलटीपी) किलोमिटर रेन्ज दिने दाबी गरिएको छ । जुन यसअघिको भोल्ट एचमा जडान गरिएको १७.३ किलोवाट आवर ब्याट्री प्याकले दिनेभन्दा १०० किलोमिटर बढी हो ।

कारको मोटर समेत ३४ किलोवाट बाट बढाएर ३५ किलोवाट पुर्याइएको छ । जसले यसअघिको मोडलको तुलनामा ८ एनएम बढि टर्क जेनेरेट गर्ने क्षमता राख्दछ छ । यसअघिको भोल्ट एचले १०२ एनएम टर्क जेनेरेट गर्दै आएकोमा नयाँ मोडलले ११० एनएम जेनेरेट गर्ने कम्पनीको भनाई छ ।

नयाँ मोडल सी प्रोले डिसी फास्ट चार्जर समेत सपोर्ट गर्ने कम्पनीको भनाई छ । मोडल एचले ३.३ किलोवाट क्षमताको एसी चार्जिङ मात्रै सपोर्ट गर्दै आएकोमा नयाँ मोडलले ३० किलोवाट क्षमताको डिसी फास्ट चार्जर समेत सपोर्ट गर्नेछ । डिसी फास्ट चार्जरको सहायतामा यसलाई ४० मिनेटमै ८० प्रतिशतसम्म चार्ज गर्न सकिन्छ ।

परिष्कृत इन्टेरियर सहित आउने यस कारमा ९ इन्चको सेन्टर टच स्क्रिन, ७ इन्चको इन्स्ट्रयुमेन्ट डिस्प्ले, एलईडी डिआरएलएस, हेलोजेन हेडल्याम्प, स्मार्ट की, रिमोट लकिङ, डुअल यूएसबी पोर्ट्स, डुअल टोन इन्टेरियर, स्पोर्ट स्टेरिङ ह्विल, इलेक्ट्रिक पावर विन्डो र ब्लुटुथ मिडिया सिस्टम पाउन सकिन्छ ।

यसैगरी, सुरक्षाका लागि यसमा सिंगल एयरब्याग, एबिएस, ईबीडी, हिल होल्ड एसिस्ट, आइएसओ फिक्स, रियर पार्किङ राडार, रिभर्स ईमेज क्यामेरा लगायत फिचर दिइएको छ । नयाँ कार लेमन ग्रिन, चेरी रेड, रबी ब्ल्याक र कोकोनट ह्वाइट गरी चारवटा कलर अप्सनमा उपलब्ध हुनेछ ।

गत नाडा अटो शोमा लन्च भएको हेनरी भोल्ट एच मोडलको अपार सफलतापछि कम्पनिले आफ्नो प्रोडक्ट लाइनअपमा नयाँ मोडल थप्न लागेको हो । हेनरी भोल्टका कारमा ग्राहकले छिटो, छरितो र प्रभावकारी सेवा पाउँदै आएका छन् ।