पुणे प्लान्टबाट टाटा ह्यारियर ईभीको उत्पादन सुरु, डेलिभरी यसै महिनादेखि

टाटा मोटर्सले आफ्नो पुणे प्लान्टबाट ह्यारियर ईभीको उत्पादन सुरु गरेको छ । उत्पादन सुरु भएसंगै सो नयाँ विद्युतीय एसयूभी अवको केहि दिनमै भारतभरका डिलरशिपहरुमा उपलब्ध हुने र यसै महिनादेखि ग्राहकलाई हस्तान्तरण गरिने छ ।

जुलाई २ देखी बुकिङ खुला गरिएको ह्यारियर ईभीले पहिलो दिनमै १० हजार अर्डर पाएको थियो । त्यसपछिका दिनहरुमा पनि बुकिङ गर्ने ग्राहकको संख्या उल्लेख्य रुपमा बढिरहेको टाटा मोटर्सको भनाई छ । यस ईभीले हालै भारत एनक्यापमा ५ स्टार सेफ्टि रेटिङ समेत प्राप्त गरेको छ ।

ह्यारियर ईभीमा ७५ किलोवाट र ६५ किलोवाट दुई ब्याट्री प्याक विकल्प उपलब्ध छ । ७५ किलोवाट ब्याट्री भएको टप मोडलमा ड्युअल मोटर सेटअप छ, जसले ५०४ एनएम टर्क उत्पादन गर्छ । यसको अगाडिबाट १५५ बीएचपी र पछाडिबाट २३५ बीएचपी पावर उत्पादन गर्छ । यसले ० देखि १०० किलोमिटर प्रतिघन्टा गति ६।३ सेकेन्डमा हासिल गर्न सक्छ ।

७५ किलोवाटको ब्याट्रीले १५ मिनेटको फास्ट चार्जिङमा करिब २५० किलोमिटरको रेन्ज दिन सक्छ। ह्यारियर ईभीमा कुल ६ ड्राइभ मोड समावेश छ । यसको अफ–रोड असिस्ट फिचरमा लो स्पिड क्रुज कन्ट्रोल समावेश छ जसले ५ किलोमिटर प्रतिघण्टाको गति कायम राख्छ।

ह्यारियर ईभी आफ्नो सेगमेन्टमा पहिलो एसयूभी हो जसमा ५४० डिग्री क्यामेरा सुविधा प्रदान गरिएको छ । साथै यसमा ब्लाइन्ड स्पट भ्यु मनिटर, रियरभ्यु मिरर क्यामेरा र बिल्ट–इन ड्यासक्यामजस्ता फिचरले एसयूभीलाई अझ सुरक्षा प्रदान गर्छ ।

सेफ्टीका लागि ह्यारियर ईभीमा ६ वटा एयरब्यागसँगै एक घुँडाको एयरब्याग गरी ७ एयरब्याग उपलब्ध छ । यसमा २० भन्दा बढी एड्भान्स एडास फिचर, ईएसपीको साथमा आई–भीबीएसी, एसओएस कल, हिल डिसेन्ट कन्ट्रोल, टायर प्रेसर मोनिटरिङ र अटोमेटिक हेडल्याम्प समावेश छ ।