ह्यारियर ईभीको ५ वटै भेरिएन्टको मूल्य सार्वजनिक, नेपालमा कति पर्ला ?

काठमाडौं– टाटा मोटर्सले हालै लन्च गरेको नयाँ बिद्युतिय एसयुभी ह्यारियर पाँच भेरिएन्टमा उपलब्ध हुने भएको छ । टाटा मोटर्सले यी पाँच वटै भेरिएन्टको मूल्य सार्बजनिक गरको छ । कम्पनिले यसअघि सुरुवाती मूल्य मात्रै सार्बजनिक गरेको थियो । जसअनुसार यसको सुरुवाती मूल्य २१ लाख ४९ हजार भारु तोकिएको थियो ।

टाटा मोटर्सका अनुसार, ह्यारियर ईभी एड्भेन्चर ६५, एड्भेन्चर ६५एस, फेयरलेस प्लस ६५, फेयरलेस प्लस ७५ र एम्पावर्ड ७५ गरी कुल ५ भेरिएन्टमा उपलब्ध हुनेछ । जसको मूल्य क्रमशः २१ लाख ४९ हजार, २१ लाख ९९ हजार, २३ लाख ९९ हजार, २४ लाख ९९ हजार र २७ लाख ९९ हजार भारु निर्धारण गरिएको छ ।

ह्यारियर नेपाली बजारका लागि समेत प्रतिक्षा गरिएको बिद्युतिय एसयुभी हो । यो एसयुभी भारतमा बिक्री सुरु भएपछि लगत्तै नेपाल आउने अपेक्षा गरिएको छ । नेपाली बजारमा यसको सुरुवाती मूल्य ६५ लाख हाराहारीबाट सुरु हुने अनुमान गर्न सकिन्छ । टप भेरिएन्टलाई भने १ करोड हाराहारी पर्ने देखिन्छ ।

यस्तो छ विशेषता
ह्यारियर ईभीमा ७५ किलोवाट र ६५ किलोवाट दुई ब्याट्री प्याक विकल्प उपलब्ध छ । ७५ किलोवाट ब्याट्री भएको टप मोडलमा ड्युअल मोटर सेटअप छ, जसले ५०४ एनएम टर्क उत्पादन गर्छ । यसको अगाडिबाट १५५ बीएचपी र पछाडिबाट २३५ बीएचपी पावर उत्पादन गर्छ । यसले ० देखि १०० किलोमिटर प्रतिघन्टा गति ६.३ सेकेन्डमा हासिल गर्न सक्छ ।

७५ किलोवाटको ब्याट्रीले १५ मिनेटको फास्ट चार्जिङमा करिब २५० किलोमिटरको रेन्ज दिन सक्छ। ह्यारियर ईभीमा कुल ६ ड्राइभ मोड समावेश छ । यसको अफ–रोड असिस्ट फिचरमा लो स्पिड क्रुज कन्ट्रोल समावेश छ जसले ५ किलोमिटर प्रतिघण्टाको गति कायम राख्छ।

ह्यारियर ईभी आफ्नो सेगमेन्टमा पहिलो एसयूभी हो जसमा ५४० डिग्री क्यामेरा सुविधा प्रदान गरिएको छ । साथै यसमा ब्लाइन्ड स्पट भ्यु मनिटर, रियरभ्यु मिरर क्यामेरा र बिल्ट–इन ड्यासक्यामजस्ता फिचरले एसयूभीलाई अझ सुरक्षा प्रदान गर्छ ।

सेफ्टीका लागि ह्यारियर ईभीमा ६ वटा एयरब्यागसँगै एक घुँडाको एयरब्याग गरी सात एयरब्याग उपलब्ध छ । यसमा २० भन्दा बढी एड्भान्स एडास फिचर, ईएसपीको साथमा आई–भीबीएसी, एसओएस कल, हिल डिसेन्ट कन्ट्रोल, टायर प्रेसर मोनिटरिङ र अटोमेटिक हेडल्याम्प समावेश छ ।