दशैंको अवसरमा थापाथली जेटुर शोरुममा पूजा सम्पन्न, जेटुर टी१ र टी२ को खुल्यो प्रि–बुकिङ

काठमाडौं - जेटुर नेपालले काठमाडौंको थापाथलीस्थित आफ्नो शोरुममा आज पूजा कार्यक्रम आयोजना गर्दै टी१ र टी२ मोडलको प्रि–बुकिङ खुला गरेको छ। यससँगै यी दुई एसयूभीका लागि ग्राहकले बुकिङ गर्न सक्ने भएका छन्।

नेपालमा नयाँ ब्रान्डको रुपमा जेटुरको शोरुम अब थापाथलीमा औपचारिक रुपमा सञ्चालनमा आउने छ । नेपालमा हुन्डाई, बीएमडब्लू, आर्कफक्स, केई लगायत ब्रान्डका सवारी साधन बिक्री गरिरहेको लक्ष्मी ग्रुप अन्तर्गतको लक्ष्मी मोटरहबले जेटुर ग्रुप समेत नेपालमा भित्र्याएको हो।

कम्पनीका अनुसार जेटुर टी१ पीएचईभीको प्रारम्भिक मूल्य १ करोड ४२ लाख ९६ हजार रुपैयाँ तोकिएको छ। त्यस्तै, जेटुर टी२ को पीएचईभी (प्लग–इन हाइब्रिड) र आईसीई (पेट्रोल इन्जिन) दुवै भेरियन्टको प्रारम्भिक मूल्य १ करोड ५५ लाख ९६ हजार रुपैयाँ कायम गरिएको छ।

जेटुर टी१ र टी२ मा आकर्षक डिजाइन, आधुनिक स्टाइलिङ र उन्नत अटोमोटिभ प्रविधि उपलब्ध रहेको कम्पनीले जनाएको छ। यी मोडलले कार्यक्षमता, आराम र विभिन्न सडक तथा ड्राइभिङ अवस्थाअनुसार उपयोगिताको संयोजन प्रदान गर्ने अपेक्षा गरिएको छ।

पीएचईभी भेरियन्टमा विद्युतीय मोटर र इन्टरनल कम्बसन इन्जिनको संयोजन रहेको छ। यसले विद्युतीय माध्यमबाट सवारी चलाउने सुविधा र इन्जिनको उपयोग गर्ने विकल्प प्रदान गर्छ। त्यस्तै, टी२ को आईसीई भेरियन्टमा अल ह्विल ड्राइभ (एडब्लूडी) प्रणाली उपलब्ध छ। यसले ग्राहकलाई आफ्नो ड्राइभिङ आवश्यकता र प्राथमिकताअनुसार विकल्प छनोट गर्ने सुविधा दिनेछ।

ग्राहकले थापाथलीस्थित जेटुरको शोरुममा पुगेर टी१ र टी२ लाई नजिकबाट अवलोकन गर्न, तिनका विशेषताबारे जानकारी लिन तथा उपलब्ध भेरियन्टबारे बुझ्न सक्नेछन्। प्रि–बुकिङ खुला भएसँगै इच्छुक ग्राहकले शोरुममै गएर यी एसयूभी बुक गर्न सक्ने कम्पनीले जनाएको छ।