नबिल बैंकले जीडब्ल्युएमका सवारी साधन किन्न ७ वर्षका लागि कर्जा उपलब्ध गराउने

काठमाडौं – ग्रेटवाल मोटर्स अर्थात जीडब्ल्युएमको नेपालका लागि आधिकारिक वितरक भीजी इम्पेक्स प्रालिले नबिल बैंक लिमिटेडसँग सवारी साधन फाइनान्स गर्नका लागि सम्झौता गरेको छ ।

जीडब्ल्युएमका इन्टरनल कम्बसन अर्थात आईसीई र विद्युतीय सवारीसाधनहरुका लागि बैंकले फाइनान्स सुविधा उपलब्ध गराउने छ । नेपाली बजारमा जीडब्ल्युएमका ह्यावल जोलायन, ह्यावल एच६, पावर, विङ्गल ५ र विद्युतीय गाडी ओरा ०३ को फाइनान्सिङ सुविधाको लागि बैंकसँग सम्झौता भएको हो ।

भीजी इम्पेक्स (जीडब्ल्युएम नेपालका भाइस–प्रेसिडेन्ट रुपेश शर्मा भट्ट र नबिल बैंक लिमिटेडका हेड अफ रिटेल लेन्डिङ चाँदनी श्रेष्ठले हिजो यस सम्बन्धी सम्झौता पत्रमा हस्ताक्षर गरेका हुन् ।

सम्झौता पत्र अनुसार ग्राहकहरुले नबिल बैंक मार्फत कुनै पनि जीडब्ल्युएमका गाडी खरिद गर्दा फाइनान्सिङ सुविधा प्राप्त गर्ने छन् ।

नबिल बैंकले आईसीई मोडललाई १२.९० प्रतिशत ब्याजदरमा ५० प्रतिशत सम्म र ईभीको लागि १२.१५ प्रतिशत ब्याजदरमा ८० प्रतिशत सम्म अटो कर्जा उपलब्ध गराउने भएको छ । दुवै अवस्थामा ऋणको अवधि भने ७ वर्षको हुनेछ ।

दुई पक्षबीच भएको सम्झौताले ठूलो संख्यामा अटोमोबाइल प्रेमीहरूले जीडब्ल्युएम नेपालबाट नै आफुलाई मनपर्ने गाडी सजिलै प्राप्त गर्न सक्नेछन् । ग्राहकहरूले अटो कर्जाको लागि आवश्यक कागजातहरू सहित नजिकैको नबिल बैंक शाखामा गएर आवेदन दिन सक्नेछन् ।

नेपालको सबैभन्दा ठूलो बैंकमध्ये एकसँगको यो सम्झौताले जीडब्ल्युएमको स्वामित्वलाई सबैका लागि अझ सुलभ बनाउने विश्वास कम्पनीले गरेको बताएको छ ।