जीडब्ल्युएमका गाडीमा फाइनान्स सुविधा उपलब्ध गराउन एभरेष्ट बैंकसँग सहकार्यको घोषणा

काठमाडौं – नेपालमा जीडब्ल्युएम अर्थात ग्रेटवाल मोटर्सका सवारी साधन बिक्री–वितरण गरिरहेको भीजी इम्पेक्सले सवारी साधन फाइनान्सिङका लागि एभरेष्ट बैंकसँग सहकार्यको घोषणा गरेको छ ।

जीडब्ल्युएमका आईसीई सवारीसाधनहरु हाभल जोलायन, हाभल एच६, पावर र विङ्गल तथा इलेक्ट्रिक गाडी ओरा ०३ लगायतका विभिन्न प्रकारका सवारी साधनहरूको वित्तीय (फाइनान्सिङ) सुविधाका लागि सो सम्झौता गरिएको हो ।

उक्त सम्झौतामा आज भीजी इम्पेक्स (जीडब्ल्युएम नेपाल) का भाइस प्रेसिडेन्ट रुपेश शर्मा भट्ट र एभरेष्ट बैंक लिमिटेडका उप–महाप्रबन्धक गौरव कुमारले हस्ताक्षर गरे ।

जीडब्ल्युएमका कुनै पनि सवारीसाधन खरिद गर्न चाहने ग्राहकहरुलाई सहज रिटेल फाइनान्सिङ अनुभव प्रदान गर्नेे उद्देश्यका साथ यो सहकार्य गरिएको बताइएको छ । यसले ग्राहकहरुलाई प्रतिस्पर्धी ब्याजदर, डाउन पेमेन्ट र कर्जा अवधि सहित विभिन्न प्याकेजहरू उपलब्ध गराउने लक्ष्य राखेको छ, जुन ग्राहहरुले आफ्नो आवश्यकताहरुको आधारमा छनौट गर्न सक्छन् ।

एभरेष्ट बैंकले अधिकतम ७ वर्षको अवधिको लागि उत्कृष्ट ब्याजदर सहितको अधिकतम ८० प्रतिशत सम्म ऋण उपलब्ध गराउने छ । ३ वर्ष सम्मको कर्जा अवधिको लागि न्युनतम प्रभावकारी ब्याजदर १०.८० प्रतिशत रहने छ ।

त्यसैगरी जीडब्ल्युएमका इलेक्ट्रिक गाडी (ईभी) को लागि ब्याजदर बेसरेटमा २ प्रतिशत अर्थात ११.३० प्रतिशत रहने छ ।

जीडब्ल्युएमका आईसीई मोडलको गाडीको लागि ब्याजदर बेसरेटमा २.५० प्रतिशत थप अर्थात ११.८० प्रतिशत रहने छ ।

यी वाहेक अन्य विभिन्न प्रक्रियाका लागि समेत विभिन्न छुट उपलब्ध गराउने बताइएको छ ।

ग्राहकहरूले अटो कर्जाको लागि आवश्यक कागजातहरू सहित नजिकैको एभरेष्ट बैंक शाखामा गएर आवेदन दिन सक्नेछन् ।