उच्च प्रविधियुक्त जेसिस्टको राया–जी इलेक्ट्रिक स्कुटर अब नेपाली बजारमा

काठमाडौं – आम उपभोक्ताहरुमा विद्युतीय सवारी साधन प्रति आकर्षण बढिरहेको बेला इन्डोनेसियाको जेसिस्ट टेक्नोलोजीमा निर्मित जेसिस्ट राया–जी विद्युतीय स्कुटर नेपाली बजारमा आएको छ । एमभी दुगड ग्रुप अन्तर्गत विवेक अटोमोवाइल्स प्रालिले जेसिस्ट राया–जी (Raya-G) इलेक्ट्रिक स्कुटर हालसालै बजारमा ल्याएको हो ।

कम्पनीले यस अघि जेसिस्ट जी१ (G1) स्कुटर बजारमा पठाएपछि प्रयोगकर्ताको राम्रो प्रतिक्रिया र अझ प्रविधिमैत्री स्कुटरको माग पश्चात जेसिस्ट राया–जी इलेक्ट्रिक स्कुटर बजारमा ल्याएको बताएको छ । विशेष गरि युवाहरुलाई लक्षित गरी ल्याइएको यो स्कुटर नेपाली माटो र भू–धरातल सुहाउँदो भएको कम्पनीको दावी छ ।

अत्याधुनिक प्रविधियुक्त यो स्कुटर दुई वटा मोडमा चलाउन सकिन्छ । पहिलो लो मोडमा ५२ किलोमिटर प्रति घण्टा र दोस्रो हाई मोडमा ७५ किलोमिटर प्रति घण्टाको दरमा चलाउन सकिन्छ । सो स्कुटरको मोटर पिक पावर ३ हजार वाट रहेको छ । स्कुटरको सबै भन्दा राम्रो पक्ष भनेको मिड ड्राइभ मोटर, बेल्ट ड्राइभ सिस्टम, स्विङ आर्म सिस्टम र पछाडि मोनो सकका साथै डिजिटल डिस्प्ले रहेको छ । जसले गर्दा स्कुटर पानी, हिलो, अफ रोड (ग्राभेल), उकालो बाटोको लागि अति नै उपयुक्त छ ।

त्यस्तै अर्को राम्रो पक्ष भनेको मोबाइल चार्जिङ प्वाइन्ट २ वटा एकै ठाउँमा राखिएको छ ।सेफ्टीको लागि दुवैतिर डिक्स ब्रेक दिइएको छ भने एचआइडी प्रोजेक्शन हेडलाइट सिष्टम जडान गरिएको हुँदा रातको समयमा टाढा सम्म चम्किलो प्रकाश प्रदान गर्ने भएकाले यात्रा गर्न सहज हुनेछ ।

सो स्कुटरमा ७२ भोल्ट २० एम्पियर क्षमताको ब्याट्री प्रयोग गरिएको हुन्छ जसलाई फुल चार्ज गर्न ३ घण्टा लाग्ने छ । कम्पनीले ब्याट्रीमा ३ वर्ष ग्यारेन्टी र १ हजार चार्जिङ साइकल दिइएको छ । त्यस्तै स्कुटरमा २ वटा ब्याट्री रहेको छ । एउटा ब्याट्रीको वजन ८ केजीको छ, जसले गर्दा सजिलैसँग बोकेर चार्ज गर्ने ठाउँसम्म लैजान सकिन्छ । स्कुटरमै पनि चार्जिङ्ग प्वाइन्ट समेत राखिएको हुँदा सिधै चार्ज गर्न पनि सकिने छ । यसको रेन्ज सिंगल ब्याट्रीले ६० किलोमिटर र डबल ब्याट्रीले १२० किलोमिटर छ । साथै यस मोडेलमा साइड स्ट्याण्ड कट आउट सेन्सर प्रदान गरिएको छ ।

राया–जी स्कुटर म्याट रातो, म्याट सिल्भर र म्याट निलो गरि तीन वटा कलरमा उपलब्ध छ । यसको मूल्य ३ लाख २० हजार रुपैयाँ तोकिएको छ भने जेसिस्ट जीवान स्कुटरको मूल्य ३ लाख ५० हजार रुपैयाँ पर्ने कम्पनीले जनाएको छ । यो स्कुटर रातो, सेतो र कालो गरि तीन वटा कलरमा उपलब्ध छ । उच्च प्रविधियुक्त टेक्नोलाजी जडित यो स्कुटर सबैको रोजाईको साधन बन्ने कम्पनीको विश्वास भएको बताएको छ ।