नाडा अटो शो २०२४ मा यी चार नयाँ ब्राण्डका प्रिमियम ईभी आउँदै

काठमाडौं– नाडा अटो शो–२०२४ मा नयाँ ब्राण्डको मिनी विद्युतिय कारदेखी प्रिमियम कारसम्म लन्च हुने तय भएको छ । भदौ ११ देखि १६ गतेसम्म आयोजना हुने उक्त सवारी मेलामा मिनिकार लुमिनदेखी प्रिमियम ब्राण्ड अवतारसम्म सार्बजनिक हुने तय भएको हो । मेलामा अवतारसहित जिकर, एक्सपेङ र जेको ब्राण्डका प्रिमियम ईभी आउने निश्चित भैसकेको छ ।

मेलामा सार्बजनिक हुने सबैभन्दा महंगो र प्रिमियम ब्राण्ड अवतारलाई एमएडब्लु र सीजी मोटर्सले संयुक्त रुपमा ल्याउन लागेका हुन् । यसैगरी, जीकरलाई शारडा ग्रुप अन्तर्गतको पायोनियर मोटोकर्प तथा एक्सपेङलाई सीजी मोटर्स र जेकोलाई शारडा गु्रुप अन्तर्गतकै अर्को कम्पनी एसपीजी अटोमोबाइल्सले सार्बजनिक गर्न लागेका हुन् ।

अवतार११
चांगन, हुवावे र सिएटिएलको सहकार्यमा उत्पादन भएको अवतार११ लाई सीजी मोटर्स र एमएडब्लु ग्रुपले संयुक्त रुपमा नेपाल ल्याउन लागेका हुन् । यो कारको लम्बाई ४४८० एमएम, चौडाई १९७० एमएम उचाई १६०१ एमएम तथा ह्विलवेश २९७५ एमएम र ग्राउन्ड क्लिरियन्स १३६ एमएम छ ।

अवतार११ मा ९०.३८ किलोवाट आवरको ब्याट्री प्याक र २३० किलोवाट क्षमताको रियर ह्विल ड्राइभ मोटर हुनेछ । यसलाई एकपटक फुल चार्ज गर्दा ५५५ किलोमिटर रेन्ज पाइन दावी छ । कारमा १०.२५ इन्चको डिजिटल इन्ट्रुमेन्ट क्लस्टर, १५.६ इन्चको इन्फोटेन्मेन्ट स्क्रीन र पछाडि बस्ने यात्रुको लागि छुट्टै १०.२५ इन्चको डिस्प्ले उपलब्ध हुनेछ ।

जिकर एक्स
चिनियाँ अटो निर्माता जीली अन्तर्गतको ईभी ब्राण्ड जीकर आफ्नो कम्प्याक्ट एसयूभी एक्स मोडलमार्फत नेपाल आउने तयारीमा छ । यो नयाँ एसयूभीको लम्बाई ४४५० एमएम, चौडाई १८३६ एमएम र उचाई १५७२ एमएम तथा ह्विलवेश २७५० एमएम र ग्राउण्ड क्लियरेन्स १७५ एमएमको छ ।

जीकर एक्समा ६९ किलोवाट आवरको ब्याट्री र पिक पावर २०० किलोवाट भएको मोटर जडान गरिएको छ । यसलाई फुल चार्जमा ४०० किलोमिटर गुडाउन सकिन्छ । कारमा १४.६ इन्चको सेन्टर कन्ट्रोल स्कृन, ८.८ इन्चको इन्ट्रुमेन्ट क्लस्टर र ५.७ इन्चको रियर क्लाइमेट सेटिङ टचस्कृन रहेको छ । साथै यसमा हेडअप डिस्प्ले समेत दिइएको छ ।

एक्सपेङ जे६
अटो शोमा सार्बजनिक हुने तय भएको एक्सपेङ जी६ को लम्वाई ४७५३ एमएम, चौडाई १९२० एमएम र उचाई १६५० एमएम तथा ह्विलवेश २८९० एमएम र ग्राउण्ड क्लियरेन्स १६० एमएमको रहेको छ । रियर र अल ह्वील ड्राइभ मोडलमा उपलब्ध यो कारमा ६६ किलोवाट अवार र ८७.५ किलोवाट अवार ब्याट्री पाउन सकिन्छ ।

यसले सिंगल चार्जमा ५०० किलोमिटर सम्म रेन्ज दिने दावी गरिएको छ । साथै यसको मोटर क्षमता २१८ र ३५८ किलोवाट छ । कारमा १५ इन्चको सेन्टर कन्ट्रोल स्कृन र १०.२ इन्चको इन्ट्रुमेन्ट क्लस्टर लगायत फिचर पाउन सकिन्छ ।

जेको जे६
यसैगरी, चेरी मातहतको प्रिमियम ईभी ब्राण्ड जेको जे६ नेपाल आउने पहिलो अफरोड ईभी हुनेछ । यो कारको लम्बाई ४४०६ एमएम, चौडाई १९१० एमएम र उचाई १७११ एमएम तथा ह्विलवेश २७१५ एमएम छ । रियर ह्विल र अल ह्विल ड्राइभ दुबै भर्सनमा उपलब्ध हुने यसको अल ह्विल ड्राइभ भर्सनले २७९ एचपी पावर दिने जनाइएको छ ।

यो नयाँ एसयूभीमा ६९.८ किलोवाट आवर क्षमतको एलएफपी ब्याट्री जडान गरिएको छ । जसले सिंगल चार्जमा ५०१ किलोमिटर रेन्ज दिने दावी गरिएको छ ।