एइटो ब्रान्डको ४ लाखौ कार एसेम्बली प्लान्टबाट सार्वजनिक, ७० हजारौं एम९ डेलिभरी

टेक्नोलोजी जायन्ट हुवावे र सेरेसद्वारा संयुक्त रुपमा डिजाइन गरिएको एइटो एम९ को ७० हजारौं युनिट ग्राहकलाई डेलिभरी गरिएको छ । त्यसैगरी एइटोले उत्पादन गरेको ४ लाखौ कार एसेम्बली लाइनमा रोल अफ गरिएको छ ।

जुलाई २९ मा एक कार्यक्रमको आयोजना गरी सेरेसले सो उपलब्धि सार्वजनिक गरेको हो । कार निर्माता कम्पनी सेरेसका अनुसार सबैभन्दा छिटो यो माइलस्टोन हासिल गर्ने एइटो पहिलो न्यु इनर्जी भेइकल ब्रान्ड बनेको छ ।

गत महिना मात्र सेरेसले एइटो ट्रेडमार्क र हुवावेबाट सम्बन्धित पेटेन्ट लिनका लागि ३४४ मिलियन अमेरिकी डलर खर्च गरेको सार्वजनिक गरेको थियो । सन् २०२१ मा स्थापना भएको एइटोका लागि सेरेस र हुवावेले संयुक्त कार्य गरिरहेका छन् । हाल एइटोले एम५, एम७ र एम९ मोडल उत्पादन गर्दै आएको छ । यस अन्तर्गत रेन्ज एक्सटेन्डर हाइब्रिड र प्योर इलेक्ट्रिक भर्सनमा सवारी साधन उपलब्ध छन् ।

जुन महिनामा एइटोले ४१ हजार २०६ अर्थात अघिल्लो वर्षको यही अवधिको तुलनामा ७०६ प्रतिशत बढी गाडी बिक्री गरेको छ । जनवरी देखि जुन सम्मको अवधिमा १ लाख ८२ हजार भन्दा बढी गाडी बिक्री गरिसकेको छ । सन् २०२४ मा ६ लाख गाडी बिक्री गर्ने एइटोको योजना छ ।

चीनका ‘न्यु फोर्स’ अटोमोटिभ निर्माता कम्पनीहरुमा सबैभन्दा टपमा एइटो ब्रान्ड पर्न सफल भएको छ ।

नेपालमा पनि हाल एमएडब्लु वृद्धि अटोकर्पले सेरेस ब्रान्डका सवारी साधन बिक्री–वितरण गरिरहेको छ । यसका आधारमा भविष्यमा एइटोका विभिन्न मोडल पनि नेपाली बजारमा उपलब्ध हुने अनुमान गर्न सकिन्छ ।