विदेशी मुद्रा सञ्चिति बढे पनि बढ्ने दर भने सुस्त, फेरि पनि कडाई हुन सक्ने

काठमाडौं – नेपाल राष्ट्र बैंकले प्रकाशन गरेको पछिल्लो तथ्यांकअनुसार विदेशी मुद्राको सञ्चिति २१ महिना यताकै उच्च विन्दुमा पुगेको छ । यस्तो सञ्चिति २०८० जेठ मसान्तमा १८.५ प्रतिशतले वृद्धि भई ११ अर्ब ३० करोड डलर कायम भएको छ ।

वैशाख महिनाको तुलनामा जेठमा विदेशी मुद्राको सञ्चिति ०.८ प्रतिशतले बढेको छ । जुन चालु आर्थिक वर्षको न्यून वृद्धिदर हो । चालु आर्थिक वर्षको साउन १.२१ प्रतिशत र भदौमा ०.७७ प्रतिशतले घटेको विदेशी मुद्राको सञ्चिति त्यसयता निरन्तर बढ्दै आएको थियो ।

भन्सार विभागका अनुसार जेठ महिनामा चालु आर्थिक वर्षमा सबैभन्दा बढी आयात भएको छ । असारमा जेठभन्दा बढी आयात हुने सम्भावना हुने भएकाले आगामी दिनमा विदेशी मुद्राको सञ्चिति घट्दै जाने राष्ट्र बैंकका अधिकारीहरुको भनाइ छ ।

पहिले एलसी खोल्ने र पछि सामान आयात गर्ने हुँदा असार देखि विदेशी मुद्रा घट्दै जाने सम्भावना हुन्छ । गत फागुन र चैतमा एलसीमार्फत आयात गरिएको सामानको भुक्तानी भएको छ । यस अनुसार आगामी दिनमा यो अझै बढ्दै जाने अनुमान गरिएको छ ।

अटोमोबाइल क्षेत्रलाई समेत देशको आर्थिक स्थितिले प्रत्यक्ष असर पारिरहेको अवस्था छ । यो अवस्थामा आगामी दिनमा फेरि विदेशी मुद्राको सञ्चिति घट्दै गएमा प्रत्यक्ष असर यही क्षेत्रलाई पनि पर्न सक्छ ।