फोर्डले भारतमा सवारी उत्पादन बन्द गर्ने, कस्तो पर्ला नेपालमा प्रभाव

बहुराष्ट्रिय अमेरिकन अटो निर्माता कम्पनी फोर्डले भारतमा सवारीसाधन उत्पादन बन्द गर्ने घोषणा गरेको छ । सन् १९९४ मा भारत प्रवेश गरेको फोर्डले २७ वर्षपछि भारतीय बजारमा सवारीसाधन उत्पादन बन्द गर्ने घोषणा गरेको हो ।

स्थानीय बजारमा बिक्री गर्नका लागि उत्पादन गरिने फोर्डका कार र एसयूभीको उत्पादन तत्कालै बन्द गरिने र यसै वर्षको अन्त्यबाट निर्यात समेत बन्द गर्ने फोर्डले बताएको छ । साथै चेन्नाईस्थित इन्जिन र भेइकल प्लान्ट भने सन् २०२२ को दोस्रो महिनादेखि बन्द गर्ने जनाएको छ ।

उत्पादन बन्द गरेपनि फोर्डले भारतीय बजारमा आफ्नो उपस्थिति भने जनाइरहने बताएको छ । जसका लागि उसले अन्य मुलुकबाट फोर्डको सीबीयू मोडल आयात गरी कारोबार गर्नेछ । उक्त कारोबारका लागि फोर्डले ११ हजार कर्मचारी परिचालन गर्ने समेत घोषणा गरेको छ ।

क्षमता अनुसार उत्पादन नहुँदा र नोक्सानी चुलिंदा बन्द गर्ने घोषणा
२७ वर्षअघि भारतीय बजारमा प्रवेश गर्दा फोर्डले निकै नै ठूलो महत्वकांक्षी योजना ल्याएको थियो । सोहीअनुरुप उसले वार्षिक ४ लाख कार उत्पादन गर्न सक्ने क्षमताको २ वटा प्लान्ट लगायो । तर सोचे अनुरुप बजारमा माग बढ्न नसकेपछि उसले कहिल्यै पनि क्षमता अनुसारको उत्पादन गर्न सकेन । हालको उत्पादनलाई हेर्ने हो भने फोर्डले वार्षिक जम्मा ८० हजार युनिट कार मात्र उत्पादन गरिरहेको छ । यो भनेको उसले उत्पादन गर्नसक्ने क्षमताको जम्मा २० प्रतिशत मात्र हो । जसको आधा हिस्सा उसले निर्यातका लागि उत्पादन गर्दै आइरहेको थियो ।

भारतमा आफूहरुले पर्याप्त लगानी गरेपनि त्यसको प्रतिफल सकारात्मक आउनुको सट्टा गएको एक दशकमा २ अर्ब डलर नोक्सान बेहोर्नु परेको फोर्ड मोटर कम्पनीका सीईओ जिम फार्लेले बताए ।

कस्तो पर्ला नेपालमा प्रभाव
भारतीय बजारमा प्लान्ट बन्द गर्ने फोर्डको यस्तो घोषणाले नेपाली उभोक्तालाई समेत प्रभाव पार्ने देखिएको छ । नेपाली बजारमा फोर्डका दशौं हजार सवारीसाधन बिक्री भैसकेका छन् । फोर्डको इकोस्पोर्ट, फिगो, फिएस्टा, फ्रि स्टाइल र एन्डेभर एसयूभी भारतबाट आयात भैरहेका छन् भने रेन्जर पिकअप थाइल्यान्डबाट आयात हुन्छ ।

यति धेरै संख्यामा बिक्री भएको सवारीसाधनको बिक्री पछिको सेवा प्रभावित बन्ने सहजै अनुमान लगाउन सकिन्छ । नेपाल आयात भएका फोर्डका प्यासेन्जर कार र एसयूभी भारतबाटै आयात भैरहेका कारण भोलिका दिनमा स्पेयर पार्ट्स र सर्भिसिङमा समस्या हुने देखिएको हो । साथै फोर्डका देशभर १ दर्जन बढी डिलरका शोरुम र सर्भिस सेन्टर समेत सञ्चालनमा छन् । यी डिलरले गरेको लगानी समेत जोखिममा पर्ने देखिन्छ । अर्कोतर्फ रिकन्डिसन बजारमा समेत यसले नकारात्मक प्रभाव पार्नेछ ।

समाचार बाहिरिएपछि फोर्डका ग्राहकले आफूसँग भएको गाडी जतिसक्दो चाँडै बिक्री गर्न चाहने हुँदा रिकन्डिसनमा खासै मूल्य पाउने छैनन् । यद्यपि नेपालस्थित आधिकारिक बिक्रेताले तेस्रो मुलुकबाट सवारी आयात गरी बिक्री गर्ने सम्भावना भने यथावतै छ ।