फोर्ड फिगो पश्चात अब फोर्ड एस्पायर पनि अटोमेटिक गियरबक्समा आउने

फोर्डले केही दिन पहिले फिगो ह्याचब्याकलाई अटोमेटिक गियरबक्सका साथ लन्च गरे पश्चात अब सब–कम्प्याक्ट सेडान एस्पायरमा पनि अटोमेटिक गियरबक्स प्रयोग गर्ने भएको छ । कम्पनीले यसमा करिव एक वर्ष पहिले अटोमेटिक गियरबक्स बन्द गरेको थियो ।

रिपोर्ट अनुसार फोर्ड एस्पायर पेट्रोल इन्जिन भेरिएन्टमा ६–स्पिड टर्क कन्भर्टर अटोमेटिक गियरबक्सका साथ लन्च गरिने छ । फोर्ड फिगो जस्तै एस्पायरमा पनि १.२ लिटर पेट्रोल इन्जिनको प्रयोग गरिने छ, जसले ९५ बीएचपी पावर र ११९ एनएम टर्क जेनेरेट गर्छ । गत वर्ष बन्द हुनु भन्दा पहिले फोर्ड एस्पायरमा १.५ लिटर पेट्रोल भर्सनमा अटोमेटिक ट्रान्समिसनको विकल्प थियो ।

फोर्ड फिगो जस्तै एस्पायरको डिजेल भेरिएन्टमा भने म्यानुअल ट्रान्समिसन मात्र हुने सम्भावना छ । फिगो जस्तै एस्पायर सेडान कारले पनि १६ किलोमिटर माइलेज दिने अनुमान गरिएको छ ।

नेपाली बजारमा पहिले देखि १.२ लिटर पेट्रोल इन्जिनयुक्त म्यानुअल भेरिएन्ट बिक्री हुँदै आएको छ । यसको मूल्य ३४ लाख ९९ हजार रुपैयाँ सम्म छ । फोर्ड एस्पायर अटोमेटिक भेरिएन्टमा आए पश्चात यसको मूल्य हालको मोडल भन्दा करिव २ लाखको हाराहारी बढ्ने अनुमान गर्न सकिन्छ ।