कोभिड बिरामी बोक्नका लागि फोर्सको सहयोग : जिपलाई एम्बुलेन्सको रुपमा प्रयोग गरिने

पोखरा – नेपालका लागि फोर्स मोटर्सको आधिकारिक बिक्रेता हिमालय अर्गनाइजेसन अन्तर्गतको आयाम इन्टरकन्टिनेन्टल प्रालिले कोभिड बिरामी बोक्नका लागि फोर्स कम्पनीकोट्रयाक्स क्रुजर जिप सहयोग गरेको छ । कोभिड महामारीको दोस्रो लहर बढेसँगै संक्रमितहरु दिनप्रदिन बढिरहेका र यस विषम परिस्थितिमा बिरामीहरुलाई गाउँगाउँबाट हस्पिटलसम्म बोक्नका लागि फोर्स ट्रयाक्स क्रुजर जिपलाई एम्बुलेन्सका रुपमा प्रयोग गर्ने गरी कम्पनीले सहयोग गरेको हो ।

आयाम इन्टरकन्टिनेन्टलका अध्यक्ष ध्रुवबहादुर थापाले २ वटा जिप शनिबार नेपाली काँग्रेस कास्कीलाई हस्तान्तरण गरे । विभिन्न गाउँपालिका तथा ग्रामीण क्षेत्रबाट कोभिड बिरामी बोक्न जिप प्रयोग गर्नेगरी सहयोग गरिएको अध्यक्ष थापाले बताए । उनका अनुसार यी जिप कोभिड अवधिभर प्रयोग विरामी बोक्न प्रयोग गरिने छ ।

त्यसैगरी कम्पनीले पोखरा महानगरपालिका र लायन्सको सहकार्यमा लेखनाथमा बन्ने सय बेड क्षमताको कोभिड हस्पिटलका लागि पनि फोर्स जिप सहयोग गर्ने भएको छ ।

कोभिड महामारीको समयमा सबैले आ–आफ्नो ठाउँबाट सहयोग गर्नुपर्ने बताउँदै थापाले आवश्यकता अनुसार आगामी दिनमा पनि आफ्नो तर्फबाट सहयोग गर्ने प्रतिबद्धता व्यक्त गरे । लायन्सका पूर्व गभर्नरसमेत रहेका थापाले अन्य २ वटा फोर्स जिपसमेत एम्बुलेन्सका रुपमा प्रयोग गर्ने गरी सहयोग गर्ने तयारी गरेका छन् । कोभिड अवधिभर प्रयोग गर्ने गरी विभिन क्षेत्र समेटेर ५ वटा जिप सहयोग गर्ने योजना थापाले बनाएका हुन् ।

थापाले आफू लायन्सको गभर्नर हुँदा फोर्स मोटर्सका करिब एक करोड रुपैयाँ बराबरका ३ वटा अत्याधुनिक एम्बुलेन्स गण्डकी, धौलागिरी र बागमती क्षेत्रमा चलाउने गरी सहयोग गरेका थिए । जुन एम्बुलेन्सले अहिलेसम्म पनि सेवा पुर्याइरहेका छन् ।