पल्सर अब फ्लेक्स फ्युलमा चल्ने, यस्तो छ विशेषता

बजाज अटोले हालै विश्वको पहिलो सीएनजी बाइक फ्रिडम १२५ लन्च गरेको छ । अब कम्पनीले आफ्नो प्रसिद्ध बाइक बजाज पल्सर एनएस १६० को नयाँ फ्लेक्स फ्युल संस्करण इन्डिया बायो-एनर्जी एण्ड टेक एक्सपो २०२४ मा सार्वजनिक गरेको छ ।

फ्लेक्स फ्युल एक वैकल्पिक इन्धन हो । वास्तवमा, फ्लेक्स फ्युल पेट्रोल, इथानोल वा मिथेनोल जस्ता इन्धनको मिश्रण हो जुन जलाउँदा कम प्रदूषण हुन्छ । हाल भारत सरकारले ई२० फ्लेक्स फ्युल मात्र बिक्री गर्न अनुमति दिएको छ । ई२० फ्लेक्स फ्युलमा ८० प्रतिशत पेट्रोल र २० प्रतिशत इथेनोलको मिश्रण हुन्छ । भारतीय सरकारले शतप्रतिशत इथानोलमा चल्ने सवारी साधनलाई प्रवर्द्धन गर्ने योजना बनाएको छ ।

मारुती सुजुकी र टीभीएस जस्ता कम्पनीले १०० प्रतिशत इथानोलमा चल्ने सवारीसाधन ल्याएका छन् । रिपोर्टका अनुसार आगामी समयमा ८० देखि १०० प्रतिशत इथानोल वा फ्लेक्स फ्युलमा चल्ने सवारी साधनले पेट्रोल र डिजेलमा चल्ने सवारी साधनलाई प्रतिस्थापन गर्नेछ । ब्राजिल र अन्य दक्षिण अमेरिकी देशमा ई८०/१०० इन्धनको खपत धेरै उच्च छ ।

बजाज पल्सर एनएस१६० फ्लेक्स फ्युल इथानोल र पेट्रोलको मिश्रणमा चल्ने कम्पनीले जनाएको छ । यद्यपि बजाज अटोले सो बाइकको बारेमा धेरै जानकारी दिएको छैन । हालै बजाज अटोका प्रबन्ध निर्देशक राजीव बजाजले इथानोलबाट चल्ने बाइक मार्च २०२५ सम्म लन्च हुने बताएका थिए ।

भारत पनि ई८०/१०० इन्धनतर्फ जाने अपेक्षा गरिएको छ। कम्पनीले फ्लेक्स फ्युलका सवारीसाधन पहिल्यै तयार गरेमा भविष्यमा यसले राम्रो मार्केट लिने र निकै सजिलो हुने अपेक्षा गरिएको छ ।