२ लाख भन्दा कम मूल्य मै खरिद गर्न सकिने ५ स्कुटर

चलाउन सजिलो र मूल्य समेत कम पर्ने विशेषताका कारण स्कुटर आम नेपाली उपभोक्तामाझ लोकप्रिय साधनका रुपमा स्थापित बनिरहेको छ । पुरुष र महिला दुबै राइडरको रोजाइमा पर्न सफल यो दुई पाङग्रे साधनको मूल्य भने इन्जिन क्षमता र उपलब्ध फिचर्सक आधारमा फरक रहँदै आएको छ ।

अहिले बजारमा १ सय सिसी देखी १५० सिसी सम्मका स्कुटर बढी प्रचलनमा रहेको पाइन्छ । जसमध्ये अधिकांश मोडलको मूल्य २ लाख माथी रहँदै आएकोमा केही स्कुटरलाई भने सो भन्दा कम रकममा समेत खरिद गर्न सकिने देखिएको छ ।

२ लाख भन्दा कम मूल्यका स्कुटरमा हिरोको ३ वटा मोडल र टिभिएको २ वटा मोडल अहिले उपलब्ध छन् । जसमध्ये सबैभन्दा सस्तो स्कुटर हिरो प्लेजर हो । १०२ सिसी क्षमताको यो स्कुटरको मूल्य १ लाख ७८ हजार ५ सय रुपैयाँ निर्धारण गरिएको छ । यो स्कुटरको पावर ६.९ बिएचपी र टर्क ८.१ एनएम रहेको छ ।

हिरोकै अर्को ११० सिसी क्षमताको प्लेजर प्लसको मूल्य १ लाख ९७ हजार ५ सय रुपैयाँ तोकिएको छ । यो स्कुटरको पावर ८ बिएचपी र टर्क ८.७ एनएम रहेको छ । त्यसैगरी हिरोकै अर्को मोडल डुएटको मूल्य १ लाख ९३ हजार ५ सय रुपैयाँ निर्धारण गरिएको छ । ११० सिसी क्षमताको यो स्कुटरको अधिकतम पवार र टर्क प्लेजर प्लस सरह नै रहेको छ ।

२ लाख भन्दा कम मूल्यका स्कुटरमा टिभिएससंग ड्याज र जेस्ट स्कुटर उपलब्ध छन् । ११० सिसी क्षमताका यी स्कुटरको मूल्य क्रमश १ लाख ९९ हजार ९ सय र १ लाख ७८ हजार ९ सय रुपैयाँ तोकिएको छ । जसमध्ये ड्याजको पावर ८.७ बिएचपी र टर्क पनि ८.७ एनएम नै रहेको छ भने जेस्टको पावर ७.७ बिएचपी र टर्क ८.८ एनएम रहेको छ ।