५ मोडलका रिभोल्ट इलेक्ट्रिक मोटरसाइकल नेपाल भित्र्याउँदै दुगड ग्रुप, यस्तो हुनेछ फिचर

काठमाडौ. – नेपाली बजारमा नयाँ इलेक्ट्रिक मोटरसाइकल ब्रान्ड रिभोल्ट भित्रिने भएको छ । नेपाली बजारमा एमभी दुगड ग्रुप अन्तर्गतको विवेक अटोमोबाइलले रिभोल्ट ब्रान्ड भित्र्याउने भएको हो ।

भारतमा राम्रो चर्चा कमाएको रिभोल्टका पाँच मोडल नेपाली बजारमा पनि उपलब्ध हुने कम्पनी स्रोतको भनाइ छ । नेपाली बजारमा पनि आरभी१, आरभी१ प्लस, आरभी ब्लेजएक्स, आरभी४०० बीआरजेड र आरभी४०० मोटरसाइकल उपलब्ध हुनेछन् ।

आरभी१ वाहेक अन्य सबै मोडलमा ३.२४ किलोवाट आवर क्षमताको ब्याट्री रहेको छ । आरभी१ मा भने २.२ किलोवाट आवरको ब्याट्री छ । त्यसगरी आरभी१ र आरभी१ प्लसमा २.८४ किलोवाटको पिक मोटर पावर र १.७९ किलोवाटको रेटेड मोटर पावर छ ।

अन्य तीन मोडलमा क्रमशः ४.०८, ४.१ र ३.९ किलोवाटको पिक मोटर पावर छ भने रेटेड मोटर पावर लगभग समान २.८ किलोवाट छ ।

यी सबै मोडलको मूल्य भने कम्पनीले लन्चिङको समयमा सार्वजनिक गर्ने बताएको छ । यी सबै मध्ये कम मूल्यको मोटरसाइकल आरभी१ हो । भारतमा यसको मूल्य लगभग ९० हजार भारु छ । सबैभन्दा बढी मूल्यको आरभी४०० को मूल्य १ लाख २४ हजार भारु छ ।

सिंगल चार्जमा १५० किलोमिटरसम्म रेन्ज दिने दाबी गरिएको रिभोल्ट मोटरसाइकललाई फास्ट चार्जरको साहयतामा ८० मिनेटमै शून्यदेखि ८० प्रतिशतसम्म चार्ज गर्न सकिन्छ ।

कम्पनीले यी मोटरसाइकलको ब्याट्रीमा ५ वर्ष अर्थात ७५ हजार किलोमिटरको वारेन्टी र चार्जरमा २ वर्षको वारेन्टी दिएको छ ।