तीन ठूला बाइक कम्पनीले घोषणा गरे एकै पटक चाडपर्व स्किम, रोजी रोजी बाइक स्कुटर लिन सकिने

काठमाडौं – नेपाली बजारमा उपलब्ध विभिन्न ब्रान्डका बाइक मध्ये तीन ठूला बाइक कम्पनी होन्डा, बजाज र टीभीएसले एकै पटक फेस्टिभल स्किमको घोषणा गरेका छन् । दसैं तिहार जस्ता चाडपर्व नजिकिएसँगै यी कम्पनीहरुले आज नयाँ स्किम सार्वजनिक गरेका हुन् ।

होन्डाले ‘होन्डा छ साथ साथ, दशैंको शुभलाभ’ नामक स्किम सार्वजनिक गरेको छ । यस अन्तर्गत ७ प्रदेशलाई समावेश गरेर हरेक प्रदेशबाट १ जनाले १ लाख रुपैयाँ जित्ने बताइएको छ । यसैगरी स्क्र्याचमा ७ लाख सम्मको क्यासब्याक पाइने र बम्परमा १५ लाख रुपैयाँ सम्म जित्न सकिने छ ।

त्यसैगरी अधिकतम ७ वर्ष सम्मको फ्रि सर्भिसिङ, स्पेयर पार्ट्समा ७ वर्ष सम्म ७ प्रतिशत छुट र बिग बाइकमा ७० हजार क्यासब्याक पाइने बताइएको छ ।

बजाजले ‘अब आधाको आधा नै काफी छ’ नामक स्किमद्वारा २५ प्रतिशत डाउन पेमेन्टमै बाइक लिन सकिने योजना सार्वजनिक गरेको छ । बाइकको मूल्यको आधाको आधा अर्थात २५ प्रतिशत मात्र नगद बुझाएर बाँकी रकम फाइनान्समार्फत किस्ताको रुपमा तिर्न सकिने छ ।

त्यसैगरी बजाज बाइक किन्दा नगद तिरेर लिनेहरुका लागि ७ हजार रुपैयाँ छुट समेत हुनेछ ।

टीभीएसले ‘टीभीएस कायापलट’ नामक स्किम सार्वजनिक गरेको छ । यस अन्तर्गत टीभीएसको कुनै पनि मोटरसाइकल वा स्कुटर खरिद गर्दा बम्पर उपहारको रुपमा ५० लाख सम्म पाउन सकिने छ । बाइक वा स्कुटर नकिनेरै पनि गएर त्यहाँ दिइएको निर्देशन अनुसार गरेमा १ लाख रुपैयाँ सम्म जित्न सकिने छ । त्यसैगरी किनेपछि १० लाख रुपैयाँ सम्म जित्न सकिने छ ।

टीभीएस बाइक वा स्कुटरको वारेमा इन्क्वायरी मात्र गरे पनि हरेक दिन रियल मी सी३० स्मार्टफोन जित्न सकिने छ । यी वाहेक हरेक हप्ता शतप्रतिशत क्यासब्याक समेत पाइने छ ।

टीभीएसका बाइक वा स्कुटर २० प्रतिशत सम्मको डाउन पेमेन्टमा लिन सकिने छ । विजेताको घोषणा लक्की ड्रमार्फत हरेक मंगलबार साँझ ५ बजे टीभीएसको नेपालका लागि आधिकारिक वितरक जगदम्बा मोटर्सको फेसबुक पेजबाट लाइभ हेर्न सकिने छ ।