गितारबाट प्रेरित ध्वनिसहित फरारीको पहिलो इलेक्ट्रिक कार

फरारी अब आफ्नो पहिलो फुल इलेक्ट्रिक कार ल्याउन तयारीको अन्तिम चरणमा पुगेको छ। कम्पनीले आफ्नो पहिलो इलेक्ट्रिक मोडलमा पनि परम्परागत उत्कृष्टता र अनुभव कायम राख्ने लक्ष्य लिएको छ। यद्यपि, यसपटक कम्पनीले अन्य कार निर्माताहरूले जस्तै नक्कली इन्जिनको आवाज प्रयोग नगरी नयाँ र मौलिक तरिकाले आवाजको अनुभव दिने योजना बनाएको छ।

फरारीले पुष्टि गरेको छ कि यसको आगामी इलेक्ट्रिक ग्रान्ड टुररमा आउने ध्वनि पूर्ण रूपमा वास्तविक हुनेछ। यसको अर्थ, कारको मोटर र ड्राइभ प्रणालीबाट उत्पन्न हुने वास्तविक कम्पनलाई प्रविधिको माध्यमबाट बढाइनेछ। यसले चालकलाई वास्तविक र उत्साहजनक अनुभव दिलाउनेछ, जसले यो कारलाई अन्य इलेक्ट्रिक सवारी साधनहरूभन्दा अलग बनाउनेछ।

हालसम्म धेरै कम्पनीले इलेक्ट्रिक कारमा कृत्रिम इन्जिन आवाज थपेर पुरानो पेट्रोल कारको अनुभूति दिने प्रयास गरेका हुन्छन् । तर फरारीले यो प्रवृत्तिलाई तोड्ने निर्णय गरेको छ । कम्पनीका इन्जिनियरका अनुसार यस आवाजको प्रेरणा इलेक्ट्रिक गितारबाट आएको हो । जसरी गितारका तारहरू कम्पन हुँदा ध्वनि उत्पन्न हुन्छ र त्यसलाई बढाएर संगीत सिर्जना गरिन्छ, त्यस्तै तरिकाले फरारीले पनि मोटर र गियर सिस्टमको कम्पनलाई प्रयोग गर्नेछ।

यसका लागि, कारको पछाडिको एक्सलमा हाई प्रिसिशन सेन्सर जडान गरिएको छ, जसले मोटरको फ्रिक्वेन्सी कैद गर्नेछ। त्यसपछि त्यो सिग्नल प्रवर्धन गरी कारको भित्री र बाहिरी दुवै भागमा वास्तविक मोटरको आवाजको रूपमा सुन्न सकिने बनाइनेछ ।

कम्पनीका अनुसार सो आवाज केवल सौन्दर्यका लागि होइन, चालकको अनुभव सुधार्नका लागि पनि डिजाइन गरिएको हो । कारको गति बढ्दा, ब्रेक गर्दा वा रियर-ह्वील ड्राइभ मोडमा स्विच हुँदा, ध्वनि पनि तदनुसार परिवर्तन हुनेछ। यसले चालकलाई इन्जिनको वास्तविक प्रतिक्रिया जस्तै महसुस दिनेछ।