यस्तो छ हिरोको स्पोर्टी स्कुटर जुम १६०, यामाहा एरोक्स र अप्रिलिया एसएक्सआरसंग प्रतिस्पर्धा हुने

हिरो मोटोकर्पले भारत मोबिलिटी ग्लोबल एक्सपो २०२५ मा जुम १६० स्कुटर १ लाख ४८ हजार भारु मूल्यमा लन्च गरेको छ । स्पोर्टी लुकको हिरो जुम १६० ले भारतीय बजारमा यामाहा एरोक्स १५५ र ​​अप्रिलिया एसएक्सआर १६० सँग प्रतिपर्धा गर्नेछ ।

कम्पनीले अटो एक्सपो २०२५  मा जुम १२५ स्कुटर पनि ८६ हजार ९०० भारुमा लन्च गरेको छ । हिरो जुम १६० को बुकिङ फेब्रुअरी देखि र डेलिभरी मार्चदेखि सुरु हुनेछ । यसमा कम्पनीले १५६ सीसीको सिंगल सिलिन्डर लिक्विड कुल्ड इन्जिनले सुसज्जित गरेको छ, जसले  ८००० आरपीएममा १४ बीएचपीको पावर र ६५०० आरपीएममा १३.७ एनएमको टर्क जेनेरेट गर्छ ।

जुम १६० मा १४ इन्चको फ्रन्ट र रियर ह्विल उपलब्ध गराएको छ । म्याक्सी स्टाइलको सो स्कुटरमा अल एलईडी लाइटिङ, कीलेस स्टार्ट, टर्न-बाय-टर्न नेभिगेसनको साथमा डिजिटल इन्स्ट्रयुमेन्ट कन्सोल र अलग सिट खोल्नको लागि बटन जडान गरिएको छ । यसको तौल १४१ किलोग्राम छ ।

स्कुटरको सिट मुनि ठुलो स्टोरेज स्पेस दिइएको छ, जसमा साना साना सामानका साथै फुलसाइजको हेलमेट राख्न सकिन्छ । स्कुटरमा स्ट्यान्डर्ड फिटमेन्टको रुपमा २४० एमएमको फ्रन्ट डिस्क ब्रेक र रियरमा ड्रम ब्रेक रहेको छ । यसको अगाडि टेलिस्कोपिक फोर्क्स र पछाडि ड्युअल स्प्रिंग्स रहेको छ ।