फिचर लोडेड नयाँ जेनेरेसन महिन्द्रा स्कोर्पियो आउँदै

महिन्द्राले नयाँ जेनेरेसन स्कोर्पियो बजारमा ल्याउने तयारी गरिरहेको छ । स्कोर्पियोको पहिलो जेनेरेसन मोडल लामो समय देखि बजारमा बिक्री भइरहेको छ र यो निकै नै लोकप्रिय पनि छ । यद्यपि बजारमा बढ्दो प्रतिस्पर्धासँग सामना गर्नका लागि महिन्द्राले नयाँ जेनेरेसन मोडल ल्याउने तयारी गरिरहेको छ ।

स्कोर्पियोको पछिल्लो २०२१ मोडल विभिन्न समयमा परीक्षण भइरहेका समाचार सार्वजनिक भइरहेका छन् । केही समय पहिले राजस्थानको मरुभूमिमा यसको परीक्षण गरिरहेको देखिएको थियो । यसको इन्टेरियरको तस्बिर पनि इन्टरनेटमा लिक भइरहेका छन् । यी सबैबाट स्कोर्पियोसँग जोडिएका विभिन्न महत्वपूर्ण जानकारी सार्वजनिक भइरहेका छन् ।

स्पाई तस्बिरका आधारमा यसमा प्रिमियम ड्यासबोर्ड भएको देख्न सकिन्छ । यसमा कालो कलरको मेटरियल प्रयोग गरिएको छ । यसमा मल्टी फङ्सन लेदर स्टेयरिङ ह्विलको प्रयोग गरिएको छ भने स्पोर्टी फिलका लागि फ्ल्याट बटमका साथ स्टेयरिङ ह्विलमा क्रोम हाइलाइट दिइएको छ ।

यसमा एप्पल कारप्ले र एन्ड्रोइड अटोलाई सपोर्ट गर्नका लागि ठूला टचस्क्रिन इन्फोटेनमेन्ट सिस्टम दिइएको छ । यसको ठिक तल एसी भेन्ट छ । यी वाहेक मिडिया कन्ट्रोल, डिफगर, हजार्ड ल्याम्प, ३६० डिग्री क्यामेरा, ड्युअल जोन क्लाइमेट कन्ट्रोल, हिटर, हिल होल्ड असिस्ट जस्ता फिचर पनि उपलब्ध छन् ।

हालको मोडल भन्दा नयाँ मोडलमा धेरै प्रिमियम र अप–मार्केट क्याबिन दिइएको छ । यसमा अटोमेटिक क्लाइमेट कन्ट्रोल, प्रशस्तै एयरब्याग, भेइकल स्टेबिलिटी म्यानेजमेन्ट, कनेक्टेड कार टेक्नोलोजीका साथ एक इलेक्ट्रिक सनरुफ पनि सामेल हुने बताइएको छ ।

यसमा क्रुज कन्ट्रोल जस्तो फिचर पनि सामेल हुनेछ । त्यसैगरी किलेस इन्ट्री, पुस स्टार्ट स्टप बटन जस्ता फिचर पनि मिल्न सक्ने सम्भावना छ । यसको बेस भेरिएन्टमा समेत ईबीडी सहितको एबीएस, बीएससीका साथ स्पिड अलर्ट, पार्किङ सेन्सर र ड्युअल एयरब्याग जस्ता फिचर सामेल हुनेछन् ।

महिन्द्राको नयाँ थारमा दिइएको इन्जिन नै नयाँ स्कोर्पियोमा पनि उपलब्ध हुने अनुमान गरिएको छ । यसको अर्थ नयाँ स्कोर्पियोमा २.० लिटर एमस्टालियोन टर्बो पेट्रोल इन्जिन र २.२ लिटर एमहक टर्बो डिजेल इन्जिन हुने सम्भावना छ । यद्यपि यी इन्जिनमा केही परिवर्तन हुने सम्भावना पनि छ ।

नयाँ स्कोर्पियोमा ल्याडर अन फ्रेम च्यासिसको प्रयोग हुनेछ, जसले गर्दा यो पहिले भन्दा लामो र फराकिलो हुनेछ ।

यही वर्ष नै लन्च गर्ने योजना भए पनि हालको कोरोना भाइरस महामारीका कारण ढिलाई भएको छ । सन् २०२२ को प्रारम्भतिरै महिन्द्राको नयाँ स्कोर्पियो लन्च हुने अनुमान गरिएको छ । यद्यपि कम्पनीले यसको वारेमा कुनै आधिकारिक जानकारी दिएको छैन ।