शीघ्र प्रिन्ट चाहने यी सेवाग्राहीले पाउने छन् ३ दिनमै स्मार्ट ड्राइभिङ लाइसेन्स

काठमाडौं – यातायात व्यवस्था विभागले शीघ्र प्रिन्ट चाहने विभिन्न व्यक्तिहरुका लागि तीन दिन भित्रै सवारी चालक अनुमति पत्र (ड्राइभिङ लाइसेन्स) दिने भएको छ ।

विभागले एक सूचना प्रकाशित गरी यो जानकारी दिएको हो । यस अनुसार अध्ययन तथा रोजगारीका लागि विदेश जाने नेपाली नागरिक र शान्ति सेना मिसनका लागि विदेश जाने नेपाली सेना एवं नेपाल प्रहरीका लागि यो सुविधा उपलब्ध हुनेछ ।

आगामी पुस १५ देखि यसका लागि अनलाइन आवेदन दिन सकिने र प्राविधिक समस्या नआएको अवस्थामा ३ कार्य दिन भित्र स्मार्ट कार्ड छपाई गरी वितरण गरिने विभागले जनाएको छ ।

सरकारले स्मार्ट लाइसेन्स जारी गरेपछि माग र आपूर्तिबीच सन्तुलन कायम गर्न नसक्दा पछिल्ला केही वर्षदेखि सवारीचालक अनुमतिपत्र प्राप्त गर्न निकै कठिनाइ भोग्नुपरेको सर्वसाधारणहरूको अनुभव छ ।