तीन महिनामा भित्रिए २१ सय बढी विद्युतीय कार, गत वर्षको तुलनामा ३ गुणा बढी

काठमाडौं– चालु आर्थिक वर्षको तीन महिना (साउन, भदौ र असोज)मा २१ सयभन्दा बढी विद्युतीय गाडी (ईभी) नेपाल भित्र्याइएको छ । भन्सार विभागको तथ्यांकानुसार यो अवधिमा दुई हजार १३५ विद्युतीय जीप, कार र भ्यान भित्र्याइएको हो ।

तीन महिनामा सबैभन्दा धेरै ५१ देखि १०० किलोवाट क्षमताका ईभी नेपाल भित्र्याइएको छ । पछिल्ला तीन महिनामा ५० किलोवाटसम्मका ९५४, १०० किलोवाटसम्मका एक हजार १६६, २०० किलोवाटसम्मका १२ र त्यसभन्दा माथिका तीन ईभी भित्र्याइएको हो । पाँच अर्ब १७ करोड ७१ लाख मूल्यबराबरका यी ईभीबाट सरकारले दुई अर्ब २४ करोड २१ लाख रुपैयाँ राजस्व संकलन गरेको छ ।

भारतबाट एक हजार ७३ र चीनबाट एक हजार ५१ ईभी नेपाल भित्र्याइएको छ । इन्डोनेसियाबाट सात र जर्मनी र दक्षिण कोरियाबाट दुई/दुई गाडी भित्र्याइएको भन्सार विभागले जनाएको छ ।

चालु आर्थिक वर्षको तीन महिनामा नेपाल आएको सो संख्या गत आर्थिक वर्ष २०७९/८० को पहिलो तीन महिनाको तुलनामा तीन गुणा बढी हो । गत वर्षको यसै अवधिमा दुई अर्ब रुपैयाँबराबरका ७०५ ईभी नेपाल भित्र्याइएको थियो । त्यसबाट सरकारले करिब ६२ करोड रुपैयाँ राजस्व संकलन गरेको थियो ।