इलेक्ट्रिक कारमा चिनियाँ ब्रान्डको हिस्सा ६४ प्रतिशत, भारतको ३५ प्रतिशतमा सिमित

काठमाडौं– नेपाली बजारमा पछिल्लो समय चीनबाट आयत हुने ईलेक्ट्रिक कारको हिस्सा वढ्दै गएको छ । चीनबाट नयाँ नयाँ ब्रान्डका ईभी भित्रिन थालेपछि भारतीय ब्रान्डको तुलनमा बजार हिस्सा फराकिलो वन्दै गएको हो ।

चालु आर्थिक वर्षको दुई महिना(साउन र भदौ) मा नेपाल आएका कुल इलेक्ट्रिक कारमा चीनको हिस्सा ६४ प्रतिशत र भारतको ३५.४० प्रतिशत देखिएको छ । भन्सार विभागले आइतबार सार्वजनिक गरेको तथ्यांक अनुसार साउन र भदौ महिनामा कुल ८९८ युनिट ईलेक्ट्रिक कार नेपाल आएका छन् । जसमध्ये चीनबाट ५७५ र भारतबाट ३१८ युनिट आयात भएका हुन् । अन्य देशबाट भने जम्मा ५ युनिट ईभी आयत भएको उक्त तथ्यांकले देखाएको छ ।

यसरी आयात भएका कारको ठूलो हिस्सा ५१ देखी १०० किलोवाटसम्म मोटर जडित सेग्मेन्टको छ । कुल ६३१ युनिट कार आयातसंगै यो सेग्मेन्टले ७० प्रतिशत बढी हिस्सा ओगटेको छ । दोस्रो धेरै आयात हुने सेग्मेन्टमा ५० किलोवाट भन्दा कम क्षमताका कारले २८ प्रतिशत हिस्सा लिएको छ । दुई महिनामा यो सेग्मेन्टको आयात २५५ युनिट भएको उक्त तथ्यांकले देखाएको हो । वाँकी २ प्रतिशतमा १०० किलोवाट माथीको छ ।

नेपालमा हाल भारतबाट टाटाका तीनवटा मोडल नेक्सन, टिगोर र टियागो, सिट्रोन ईसी३ तथा एमजी कमेट आयात हुँदै आएको छ । यी मध्ये कमेट, टिगोर र टियागो ५० किलोवाट भन्दा कम क्षमताका हुन् । यसैगरी चीनबाट बीवाईडी, नेटा, एमजी र सेरेस ब्रान्डका एक दर्जन हाराहारी मोडल आयात भइरहेका छन् । चीनबाट आयात हुने बीवाइडी डल्फिन तथा एट्टो३, एमजी जेडएस तथा एमजी४, नेटा भी, सेरेस–३ जस्ता मोडल १०० किलोवाट भन्दा कम क्षमतामा छन् ।

चालु आर्थिक वर्षको बजेटमा सरकारले १०० किलोवाट माथीको सेग्मेन्टमा भन्सार र अन्तशुल्क घटाएर मूल्य समायोजन गरेपनि बजारमा भने १०० किलोवाट भन्दा कम क्षमताका इलेक्ट्रिक कारको मागमा उच्च बृद्धि देखिएको हो ।