पुस महिना सम्म कति भित्रिए नेपालमा ईभी ? यस्तो देखियो तथ्यांक

काठमाडौं – चालु आर्थिक वर्ष २०८२/०८३ को पहिलो ६ महिना अर्थात साउन देखि पुस सम्म ५ हजार ७१ युनिट विद्युतीय सवारीसाधन अर्थात ईभी कार, जिप र भ्यान नेपाल भित्रिएका छन् । भन्सार विभागले सार्वजनिक गरेको तथ्यांक अनुसार गत साउनदेखि पुस सम्मको तथ्यांकले यो देखाएको हो ।

यो भन्दा पहिले गत मंसिर सम्ममा ३ हजार ७९८ युनिट ईभी आयात भएका थिए । यस अनुसार पुस महिनामा मात्र १ हजार २७३ युनिट ईभी आयात भएका छन् ।

यस अवधिमा ५० किलोवाट सम्मका १ हजार ५८५ युनिट ईभी नेपाल भित्रिएका छन् । यस्तै, ५१ देखि १०० किलोवाट सम्मका ३ हजार १७ युनिट, १०१ देखि २०० किलोवाट सम्मका ४६३ युनिट र २०१ देखि ३०० किलोवाट सम्मका ६ युनिट ईभी नेपालमा आयात भएको भन्सार विभागले जनाएको छ ।

यो भन्दा पहिले मंसिर महिनामा ५० किलोवाट सम्मका १ हजार २१५ युनिट ईभी नेपाल भित्रिएका छन् । यस्तै, ५१ देखि १०० किलोवाट सम्मका २ हजार १६४ युनिट, १०१ देखि २०० किलोवाट सम्मका ४१४ युनिट र २०१ देखि ३०० किलोवाट सम्मका ५ युनिट ईभी नेपालमा आयात भएको भन्सार विभागले जनाएको छ ।

पुस महिना सामान्यतः ईभी आयात धेरै नहुने महिना नै हो । यो भन्दा पहिले गत वर्षको पुस महिना सम्म ५ हजार ४८० ईभी आयात भएका थिए भने यो भन्दा पहिले २०८० सालको पुस मसान्त सम्म ४ हजार ८०७ ईभी आयात भएका थिए । यस अनुसार समग्र ईभी आयात पहिलेको वर्ष जस्तै नै छ ।

यी मध्ये सबैभन्दा धेरै ईभी चीन र त्यसपछि भारतबाट भित्रिएका छन् ।