जेठ महिनामा भित्रिए २ हजार २४० ईभी, पहिले र अहिलेको ट्रेन्डमा के फरक ?

काठमाडौं – यो वर्षको जेठ महिनामा नेपालमा २ हजार २४० इलेक्ट्रिक कार अर्थात ईभी भित्रिएका छन् । भन्सार विभागले हालै सार्वजनिक गरेको नयाँ तथ्यांक अनुसार २०८३ जेठ महिनामा सो संख्यामा ईभी भित्रिएका हुन् ।

यो भन्दा पहिले चालु आर्थिक वर्षमा गत बैशाख महिना सम्म नेपालमा १ हजार ४३४ ईभी अर्थात कार, जिप र भ्यान भित्रिएका थिए । जेठ महिना सम्म नेपालमा १० हजार ८४५ ईभी भित्रिएका छन् ।

सामान्यतः बैशाख र जेठ महिनामा नेपालमा धेरै ईभी भित्रिने गरेको रेकर्ड छ । यो भन्दा पहिले गत वर्ष अर्थात २०८२ जेठमा मात्र ३ हजार ६३३ ईभी भित्रिएका थिए भने बैशाखमा १ हजार ८९२ ईभी आयात भएका थिए । यो भन्दा अघिल्लो आर्थिक वर्षको समय अर्थात २०८१ जेठमा मात्र करिव ३ हजार हाराहारी अर्थात २ हजार ९६५ ईभी नेपाल भित्रिएका थिए । यस अनुसार उक्त आर्थिक वर्षमा नेपाल भित्रिएका ईभीमध्ये जेठ महिनामा मात्र २६ प्रतिशत ईभी भित्रिएका थिए । त्यसैगरी सोही वर्षको बैशाख महिनामा १ हजार ४०४ ईभी नेपाल भित्रिएका थिए । यस अनुसार चालु आर्थिक वर्षको जेठ महिनामा कम ईभी भित्रिएका छन् ।

नेपाल भित्रिने ईभी मध्ये अधिकांश चीन र भारतबाट भित्रिने गरेका छन् १०० किलोवाट सम्मका धेरै भित्रिने गरेको पाइन्छ ।

चालु आर्थिक वर्षमा ईभी आयात घट्दा पेट्रोल कारमा भने वृद्धि देखिएको छ । ११ महिनाको अवधिमा ४ हजार ५७४ युनिट पेट्रोल कार आयात भएको छ ।

यो गत वर्ष सोही अवधिको तुलनामा २१.६२ प्रतिशत धेरै हो । गत वर्ष जेठसम्म कुल ३ हजार ७६१ युनिट पेट्रोल कार आयात भएको थियो । बजारमा आइस कारको माग बढेसँगै आयात पनि बढेको हो । यद्यपि, पछिल्लो समय इरान युद्धका कारण कच्चा तेलको मूल्य अचाक्ली बढेपछि पेट्रोल कार आयात सुस्ताएको छ ।