९ महिनामा नेपाल भित्रिए करिव ८ हजार ईभी, चैतमा मात्र भित्रिए करिव ९ सय ईभी

काठमाडौं – नेपाली बजारमा चालु आर्थिक वर्ष अर्थात गत साउन देखि चैत महिना सम्ममा करिव ८ हजार ईभी भित्रिएका छन् । भन्सार विभागको तथ्यांक अनुसार चैत महिना सम्ममा ७ हजार ९६७ ईभी अर्थात कार, जिप र भ्यान भित्रिएका छन् ।

यी मध्ये अनएसेम्बल अवस्थाका ९ युनिट छन् भने बाँकी सबै तयारी अवस्थाका ईभी हुन् । यस अनुसार चैत महिनामा मात्र ८८७ युनिट ईभी नेपाल भित्रिएका छन् ।

यो भन्दा पहिले गत फागुन महिना सम्ममा ७ हजार ८० युनिट ईभी भित्रिएका थिए । फागुनमा ८२४ युनिट ईभी भित्रिएका थिए ।

चैत महिना सम्म भित्रिएका ईभी मध्ये धेरैजसो चीन र केही संख्यामा भारतबाट भित्रिएका ईभीको बाहुल्यता छ । ५० किलोवाट सम्मका ईभी २ हजार ७८३ युनिट भित्रिएका मध्ये चीनबाट १ हजार ५४६ र भारतबाट १ हजार २३४ युनिट भित्रिएका छन् । बाँकी ३ युनिट इन्डोनेसियाबाट भित्रिएका छन् ।

५१ देखि १०० किलोवाटको ईभी भने चीनबाट ३ हजार ६२४ र भारतबाट ७८९ युनिट भित्रिएका छन् । त्यसैगरी १०१ देखि २०० किलोवाट सम्मका ईभी चीनबाट ७१० युनिट र जर्मनीबाट २६ युनिट भित्रिएका छन् ।

कुल १८ अर्ब ६२ करोड २३ लाख रुपैयाँमा उक्त संख्यामा विद्युतीय कार आयात भएका हुन् । उक्त कार आयात बापत सरकारले ११ अर्ब ४७ करोड रुपैयाँ राजस्व प्राप्त गरेको छ ।