धनगढी उपमहानगरपालिका परिसरमै गाडीको चार्जिङ स्टेसन सञ्चालन

काठमाडौँ- पछिल्लो समय नेपालमा विद्युतीय सवारीको माग र आपूर्ति बढ्दै गएको छ । आर्थिक वर्ष २०८०\०८१ को भन्सार विभागको तंथ्याक अनुसार ४ हजार ५० वटा विद्युतीय सवारी आयात भएको छ ।

स्थानीय तहदेखि केन्द्र सरकारले विद्युतीय सवारीको लागि आवश्यक पर्ने पूर्वधार निर्माणको लागि विभिन्र कामहरू गर्दै आएका छन् । नेपाल विद्युतीय प्राधिकरणले देशभर ५१ वटा चार्जिङ्ग स्टेशन निर्माण गरेको छ । त्योसँगै नेपाल विद्युत प्राधिकरणले सुदूरपश्चिम प्रदेश राजधानी धनगढी सहरमा विद्युतीय सवारी (ईभी) चार्जिङ स्टेसन सञ्चालनमा ल्याएको छ । धनगढी उपमहानगरपालिका कार्यालय परिसरमा राखिएको चार्जिङ स्टेसन आइतबार देखि सञ्चालनमा आएको हो ।

धनगढीमा सञ्चालन गरिएको चार्जिङ स्टेसन १४० किलोवाट क्षमताको छ । चार्जिङ स्टेसनमा एक घण्टाभन्दा कम समयमा चार्ज गर्न मिल्ने ६० किलोवाटका दुई वटा डिसी र २२ किलोवाटको एउटा एसी चार्जर राखिएको छ । सवारी साधनको चार्ज गर्न ग्राहकले क्यूआर कोड र मोबाइल एपमार्फत बिलको भुक्तानी गर्न सक्ने व्यवस्था मिलाइएको छ ।

गाडी चार्ज शुल्क समेत निर्धारण गरिएको छ । बिहान र रातिको समयमा प्रतियुनिट १० रुपैयाँ ४४ पैसा, दिउँसो ८ रुपैयाँ २८ पैसा र राति ११ बजेपछि ६ रुपैयाँ प्रतियुनिट शुल्क तोकिएको प्राधिकरणले जनाएको छ ।

विद्युत प्राधिकरणले निर्माण गरेका चार्जिङ स्टेसनमा राखिएको क्यूआर कोड स्क्यान गरी मोबाइल एपबाटै रकम भुक्तानी गर्नुपर्ने हुन्छ । यी चार्जिङ स्टेसनमा सहयोगका लागि मानिस आवश्यक नपर्ने भएकाले 'म्यान लेस' भन्ने गरिएको छ ।

उपमहानगरपालिकाकी उपप्रमुख कन्दकला रानाले उक्त चार्जिङ स्टेसनको उद्घाटन गरेकी थिइन् । देशभर चार्जिङ स्टेसन नेटवर्क निर्माण गर्ने प्राधिकरणको योजना अन्तर्गत धनगढीमा चार्जिङ स्टेसन सञ्चालनमा आएको हो ।