युरोपेली स्टाइलको फक्सवागन टाइगुनमा हुनेछन् यस्ता फिचर : आइतबार सार्वजनिक हुँदै नेपालमा

काठमाडौं – भारतीय बजारमा केही दिन पहिले फक्सवागन टाइगुन कम्प्याक्ट एसयूभी लन्च भएको छ । नेपाली बजारमा पनि यो गाडी लन्च गर्ने भव्य तयारी भइरहेको छ । नेपाली ग्राहकले समेत व्यग्रतापूर्वक प्रतीक्षा गरिरहेको एसयूभी हो टाइगुन ।

पहिले असोज १५ गते सार्वजनिक गर्ने तयारी भएकोमा अब भने असोज १७ गते आइतबार मात्र सार्वजनिक हुने नेपालका लागि फक्सवागनको आधिकारिक वितरक पूजा इन्टरनेसनल स्रोतले बताएको छ । सुनौली नाका हुँदै नेपाल भित्रिने फक्सवागन टाइगुनको ‘टाइगुन टर्बो ड्राइभ ¥याली’ समेत गरिने बताइएको छ ।

टाइगुनको युरोपेली स्टाइलले धेरैलाई लोभ्याइरहेको छ । केही दिनमै १२ हजार युनिट बुकिङ भएर यसले रेकर्ड कायम गरेको छ । टाइगुनको प्रतिस्पर्धा स्कोडा कुशाक, किया सेल्टोस र हुन्डाई क्रेटासँग हुनेछ ।

टाइगुनको चिक स्टाइलिङ, फिचर लोडेड क्याबिन र मल्टिपल गियरबक्स कम्बिनेसनले ग्राहकलाई लोभ्याइरहेको छ । यी वाहेक अन्य धेरै फिचरले समेत फक्सवागन टाइगुनलाई विशेष बनाएको छ ।

डिजिटल ककपिट
टाइगुन एसयूभीमा डिजिटल ककपिट दिइएको छ । यसमा इन्स्ट्रयुमेन्ट कन्सोलका लागि ८ इन्चको डिस्प्ले उपलब्ध छ । इन्स्ट्रयुमेन्ट क्लस्टरमा पुरै डिजिटल इन्टरफेस छ, जसलाई कस्टमाइज गर्न सकिन्छ । अलग अलग प्यारामिटरका लागि युजरले एनालग र डिजिटल छान्न सक्छन् ।

इलेक्ट्रोनिक स्टेबिलिटी कन्ट्रोल
टाइगुन एसयूभीमा ४० भन्दा धेरै सेफ्टी फिचर उपलब्ध छन् । ती मध्ये सबैभन्दा महत्वपूर्ण इलेक्ट्रोनिक स्टेबिलिटी कन्ट्रोल हो । टाइगुनको सबै भेरिएन्टमा यो फिचर उपलब्ध छ ।

एन्ड्रोइड अटो र एप्पल कारप्ले
धेरै कम्पनीहरुले सुरुवाती भेरिएन्टमा धेरै इन्फोटेनमेन्ट युनिट दिएको पाइदैन । तर टाइगुनको सुरुवाती भेरिएन्टमै एन्ड्रोइड अटो र एप्पल कारप्ले सपोर्ट उपलब्ध छ । इन्ट्री लेवल टाइगुनमा ७ इन्चको टचस्क्रिन डिस्प्ले छ, जसले यसलाई सपोर्ट गर्छ । माथिल्लो भेरिएन्टमा १०.१ इन्चको स्क्रिन उपलब्ध हुनुका साथै अन्य फिचर समेत उपलब्ध हुन्छ ।

भेन्टिलेटेड फ्रन्ट सिट
मौसम अनुसार गाडी भित्र कहिले गर्मी हुन्छ भने कहिलेकाहि चिसो हुन्छ । यो अवस्थामा भेन्टिलेटेड फ्रन्ट सिटको आवश्यकता पर्छ । किया सोनेट, किया सेल्टोस र हुन्डाई क्रेटामा जस्तै टाइगुनमा पनि यो फिचर उपलब्ध छ ।

फक्सवागन टाइगुन दुई इन्जिन विकल्पमा उपलब्ध भएको छ । पहिलो १.० लिटर टीएसआई टर्बो पेट्रोल इन्जिनले ११३ बीएचपी पावर र १७५ एनएम टर्क जेनेरेट गर्छ । यसमा ६–स्पिड म्यानुअल र ६–स्पिड अटोमेटिक गियरबक्स उपलब्ध छ । त्यसैगरी अर्को १.५ लिटर टर्बोचार्ज्ड पेट्रोल इन्जिन छ, जसले १४८ बीएचपी पावर र २५० एनएम टर्क जेनेरेट गर्छ । यसमा ६–स्पिड अटोमेटिक र ७–स्पिड डीएसजी अटोमेटिक गियरबक्सको विकल्प उपलब्ध छ ।

नेपालमा यसको मूल्य ५२ लाख देखि ७३ लाख रुपैयाँ सम्म पर्ने अनुमान गर्न सकिन्छ ।