नागढुंगा सुरूङमार्गबाट काठमाडौं आउन थाले अत्यावश्यक सेवाका गाडी 

काठमाडौं- नागढुंगा सुरूङमार्गबाट एम्बुलेन्सलगायत अत्यावश्यक सेवाका गाडी पठाउन सुरु भएको छ।

धादिङको सिस्नेखोलादेखि काठमाडौंको बलम्बुस्थित सुरूङमार्गबाट एम्बुलेन्सलगायत सवारी साधन पठाउन थालिएको हो।

पूर्ण रुपमा निर्माण सम्पन्न भइनसके पनि आपतकालीन अवस्थामा उक्त सुरुङमार्ग प्रयोगमा ल्याइएको सडक विभागले जनाएको छ । गत वैशाख ३ गते ब्रेक थ्रु गरिएको उक्त सुरुङमार्गमा फिनसिङको काम बाँकी हुँदा संचालनमा आउन सकेको छैन् । यो सुरूङ २ हजार ६८८ मिटर लामो छ ।

सडक विभागका  सूचना अधिकारी अमितकुमार शर्माले पृथ्वी राजमार्गमा पर्ने धादिङ झ्याप्लेखोला पहिरोले गर्दा काठमाडौं छिर्ने र बाहिरिने सवारी साधनलाई वैकल्पिक मार्गबाट पठाउन थालिएको जानकारी दिए।

बिरामी बोकेका एम्बुलेन्सलगायत अत्यावश्यक सेवाका सवारी साधनलाई नागढुंगा सुरूङमार्गबाट काठमाडौं पठाउन थालिएको उनले बताए। यस्तै काठमाडौंबाट बाहिरिएका सवारी साधनलाई पनि पिपलबोटलगायत ठाउँबाट वैकल्पिक मार्गबाट पठाइएको छ।

झ्याप्लेखोलामा शनिबार लेदोसहित खसेको पहिरो अझै पन्छाउन सकिएको छैन ।